OÉ-CUSSE, 13 marsu 2024 (TATOLI) – Komunidade sira hamutuk uma-kain neen hosi suku Bene-Ufe, sub-rejiaun Nítibe, husu Governu liuhosi Autoridade Rejiaun Administrativa Espesiál Oé-Cusse Ambeno (RAEOA), atu fasilita materiál konstrusaun hodi muda ba fatin seluk, tanba sira hela tinan barak ona, antes konstrui edifísiu administrasaun Nítibe.
Jestór sesante sub-rejiaun Nítibe, Teodoro Sila, hateten, uma-kain neen, ne’ebé iha rai Estadu ne’e dezde 2004 antes konstrui edifísiu Administrasaun nian, nune’e sira husu apoia materiál, bele buka fali fatin seluk.
“Antes ne’e prosesa la’o ona, maibé ikus mai seidauk iha rezultadu, tan ne’e ha’u fiar sei kontinua haree uma-kain hira mak sei hela iha areador postu Nítibe, fasilita sira materiál, sira la husu atu indemniza maibé apoia muda fatin ba fali fatin seluk, atu halo netik sira-nia uma hela fatin,” Teodoro Sila, hateten iha Oé-Cusse.
Notísia relevante: Jestór Nítibe rekomenda pontu haat ba Autoridade RAEOA presiza konsidera
Komunidade afetada, Cerafina Tamele hosi suku Bene-Ufe, hateten, hansean okupante, rekoñese estatutu rai Estadu nian, no prontu atu husik fatin ne’e, maibé kbiit lato’o atu sosa materiál hodi halo uma.
“Ami hela iha ne’e, hosi tinan 2004 to’o agora bainhira halo konstrusaun edifísiu administrasaun ne’e, Governu la konsulta ho ami, ami husu tulun ba Governu atu tau matan mai ami, ajuda netik ami, tanba ami atu sai hosi fatin ida-ne’e, maibé kbiit laiha atu halo ami-nia fatin rasik iha fatin seluk tán, tanba durante ne’e ami hein kleur ona, hosi VIII Governu to’o agora seidauk responde,” nia katak.
Iha fatin hanesan, Agostinho Mese, hosi suku Bene-Ufe, informa, daudaun komunidade uma-kain neen, sei kontinua hela iha kompaun administrasaun Nítibe, hodi hein apoia hosi Governu.
“Ami uma-kain neen (6), hanesan okupante iha área estatál ne’e, balu hela iha 2004 balu hela iha 2013, foin daudaun Governu mai haree ona ami, dehan atu haruka karta mai atu hasai ona ami hosi fatin ne’e, maibé to’o agora seidauk, agora troka tán jestór ona, depois se mak atu haree ami, ami hakarak, halo ami uma iha fatin seluk, ami prontu hamamuk fatin ne’e, ami la kontra Governu, maibé triste atu sai halo uma kbiit la to’o,” nia dedan.
Hatan ba problema ne’e, Prezidente Autoridade RAEOA, Rogériu Tiago Lobato, sei informa ba Sekretáriu Rejionál Administrasaun, bele rezolve hodi fornese kompensasaun, tanba konsidera komunidade hela tinan barak ona.
“Sé rai Estadu nian maka komunidade sira okupa kleur ona, maibé Estadu presiza rai ne’e harii edifísiu postu administrativu Nítibe nian, ita mós atu hasai ema sira-ne’e, tenke fó kompensasaun ruma, tanba sira tenke sai hosi ne’ebá ba fali fatin seluk, tanba kompensasaun atu hadi’a fali sira-nia uma, ne’e rai Estadu nian, agora kuandu rai privadu nian, ne’e tenke halo negosiasaun maibé komu rai Estadu entaun ne’e kazu ki’ik sei rezolve,” nia promete.
Notísia relevante: Autoridade RAEOA inaugura edifísiu administrasaun Nítibe
Jornalista: Abílio Elo Nini
Editór: Evaristo Soares Martins
