OÉ-CUSSE, 13 marsu 2024 (TATOLI) – Ministériu Ensinu Superiór, Siénsia no Kultura (MESSK) liuhosi Diresaun Nasionál Ensinu Superiór, kuarta ne’e hala’o monitorizasaun ba atividade letiva kona-bá prosesu ensinu no aprendizajen iha Dili Institute of Technology (DIT), Kampus Rejionál Oé-Cusse.
Sebastião Manuel Perreira, nu’udar Tékniku Diresaun Nsionál Ensinu Superiór iha MESSK, hateten, atividade monitorizasaun realiza ba instituisaun ensinu superiór públiku no privadah ne’ebe eziste iha Timor-Leste.
“Ekipa ne’ebé ami mai iha ne’e, atu hala’o monitorizasaun ba atividade letiva sira-ne’ebé maka durante ne’e la’o ona iha DIT Oé-Cusse,” Sebastião Manuel Perreira, ko’alia iha DIT Palaban Oé-Cusse.
Notísia relevante: MESSK sei avalia UNPAZ no DIT loke klase paralela iha Oé-Cusse
Nia hateten, monitorizasaun ne’e realiza kada tinan hanesan planu asaun anuál hosi Diresaun Nasionál Ensinu Superiór nian, atu haree lala’ok atividade sira-ne’ebé la’o iha DIT durante ne’e iha Oé-Cusse, no hetan lisensiamentu hosi Governu atubele hala’o atividade ensinu prosesu aprendizajen hanesan ensinu superiór privada.
“Rezultadu monitorizasaun ne’e, ami seidauk bele fó sai, ami sei hala’o vizita ba fasilidade ne’ebé eziste iha DIT Oé-Cusse, no ikusliu ekipa sei elabora relatóriu saida maka ekipa deteta, sei aprezenta ba fila-fali ba iha estrutura DIT, aprezenta mós ba MESSK, atu bele fó solusaun,” nia katak.
Sebastião Manuel Perreira, hateten, motorizasaun ne’e, realiza bazea ba dekretu-lei númeru 56/2023, 05 setembru, kona-bá organika MESSK, sita iha ártigu 15 alinea B, fó kompeténsia ba Diresaun Nasionál Ensinu Superiór Siénsia no Kultura, atu halo monitorizasaun ba estabelesimentu ensinu superior públiku no privada iha Timor-Leste.
Tan ne’e atu monitoriza estabelesimentu ensinu superior públiku no privada sira, bazea diploma ministeriál númeru 02/2024, 24 janeiru, kona-bá orgánika Diresaun Jerál Ensinu Superiór, fó kompeténsia, atu halo akompañamentu ba atividade letiva sira-ne’ebé maka la’o iha instituisaun públiku no privadu sira.
Nune’e mós bazea dekretu-lei númeru 68/2022, 14 setembru, kona-bá rejíme jurídiku estabelesimentu iha artigu 16 alinea 2, fó kompeténsia ba Governu atu halo supervizaun ba estabelesimentu ensinu superior públiku no privada.
Ikusliu diploma ministeriál númeru 27/2022, ne’ebé maka konsede lisensiámentu ba DIT, kursu autorizadu sira-ne’ebé maka estabelese iha DIT.
Iha fatin hanesan, Diretór DIT Oé-Cusse, João Muni, hateten, nu’udar Diretór ho estrutura tomak, sei koopera no fó apoia ba prosesu avaliasaun iha mudansa no obstakulu ruma, ekipa nasionál sei fó sai iha rezultadu avaliasaun.
“Ha’u prontu atu halo monitorizasaun ba kampus DITREO, liuliu kursu ne’ebé eziste iha ne’e, hanesan Komputer Since no Jestaun Jerál nian, iha preokupasaun ka susesu ruma ita sei deskobre iha iha ne’ebá, tanba ekipa nasionál sei iha ne’e durante loron rua,” nia katak.
Nia informa, tuir lolos Vice-Reitór na’in-haat hola parte iha sesaun avaliasaun ne’e, maibé tanba situasaun udan, la konsege partisipa, maibé esforsa bele to’o iha sesaun enseramentu.
Nune’e iha iha ámbitu monitorizasaun iha konkluzaun ruma, bele hamutuk ho ekipa Diresaun Nasionál, karik iha rekomendasaun nune’e bele hadi’a iha futuru.
Notísia relevante: MESSK hala’o teste orál ba estudante 278 iha Oé-Cusse atu asesu rejime hakbiit
Entretantu, DITKREO Oé-Cusse iha kursu rua, departamentu komputer since no departementu jestau jerál no daudaun ne’e akumula estudante hamutuk na’in-94 maka hala’o hela estudu.
Jornalista: Abílio Elo Nini
Editór: Evaristo Soares Martins
