Dezastre naturál estraga estrada iha Tapo ligasaun Lolotoe – Maliana
BOBONARO, 14 marsu 2024 (TATOLI)-Estrada iha área Oe-pho, suku Tapo, postu administrativu Bobonaro, ligasaun hosi postu administrativu Lolotoe ba postu administrativu Maliana hetan estragus totál hafoin uda-boot.
Xefe suku Tapo, Xavier Pires, informa akontesimentu ne’e akontese iha loron-kuarta (13/03), tuku 05:00 dadeersan.
Notísia relevante: Xefe suku Tapo husu IGEADI normaliza kondisaun estrada Oe-Leu ho urjénsia
“Agora daudaun ninia kondisaun grave atu hateten totalmente kotu, ninia penahan bronjong (gabiaun) ne’ebé uluk projetu kompañia sira halo ne’e mak halai totál,” nia informa ba Tatoli liuhosi telefónika, kinta ne’e.
Nia dehan, situasuan ne’e fó impaktu ba movimentasaun transporte públiku no privada.
Nia rekomenda ba Autoridade kompetente atu orienta Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI,IP, sigla portugés) Brigada Maria Tapo atu halo intervensaun lalais.
“Se lae araska, tanba agora transporte hanesan karreta, labele liu deit, paradu totál, kareta sira horiseik hosi Lolotoe tún mai mós barak mak fila-fali, inklui hosi Bobonaro sa’e ba, ita ho motores mós presiza ema ajuda, dalaruma selu mak foin bele ultrapasa,” líder komunitária ne’e katak.
Enkuantu estrada refere liga mos hosi postu administrativu Bobonaro ba munisípiu Covalima.
Notísia relevante: ME seidauk hadi’a EBC Tapo ne’ebé anin sobu dezde 2022
Jornalista: Sérgio da Cruz
Editór: Evaristo Soares Martins
