iklan

EDUKASAUN, HEADLINE, MUNISÍPIU, OÉ-CUSSE (RAEOA), POLÍTIKA

Governu presiza veteranu nia oan 100 iha Oé-Cusse atu asesu bolsa estudu

Governu presiza veteranu nia oan 100 iha Oé-Cusse atu asesu bolsa estudu

Edifísiu Konsellu Veteranu Oé-Cusse. Imajen Tatoli/Abílio Elo Nini.

OÉ-CUSSE, 14 marsu 2024 (TATOLI) – Governu liuhosi Ministériu Asuntu Kombatente Libertasaun Nasionál (MACLN, sigla portugés), daudaun ne’e loke ona vaga 100, espesialmente ba veteranu no martír sira-nia oan iha Rejiaun Administrativa Espsiál Oé-Cusse Ambeno (RAEOA), atubele asesa bolsa estudu veteranu nian ba tinan fiskál 2024 nian.

Notísia relevante: MAKLN prevee millaun $1,1 hodi fó bolsa estudu ba veteranu nia oan

Prezidente Konsellu Munisipál Kombatente Libertasaun Nasionál, (CMCLN, sigla portugés) Oé-Cusse, Venêncio Lafo, esplika, rejime atribuisaun  bolsa estudu ne’e, espesialmente ba kombatente no mártir nia ona sira, ne’ebé loke hosi Ministériu Asuntu Kombatente Libertasaun Nasionál (MAKLN), ho baze dekretu-lei númeru 8/2009, loron 15, fulan-janeiru.

“Bolsa estudu ne’e loke ba veteranu no mártir sira-nia oan, maibé ba pensaun ka partisipasaun 8a14, maka iha direitu atubele asesu bolsa estudu ida-ne’e, ne’ebé agora ita hahú loke ona inskrisaun hahú iha 05 marsu sei termina iha 03 abríl 2024,” Venâncio Lafo, ko’alia iha edifiísiu CMCLN, Oé-Cusse, kinta ne’e.

Prezidente Konsellu Veteranu Oé-Cusse ne’e, informa, númeru bolsa estudu Ministériu Asuntu Kombatente Libertasaun Nasionál, fó tarjetu ba Oé-Cusse hamutuk na’in-100.

Hosi númeru 100 ne’e, kabe ba eskola ensinu báziku primeiru siklu presiza ema na’in-lima (5), segundu no terseiru siklu  presiza na’in-15, ba ensinu sekundáriu jerál no tékniku vokasionál persiza na’in-25 no ensinu superiór universitáriu rai laran presiza na’in-50 ba rai liur presiza na’in-lima (5).

“Ida-ne’e maka tarjetu ne’ebé ministériu fó mai Oé-Cusse hamutuk na’in-100, maibé agora ami foin simu na’in- 12, halo ona inskrisaun, ensinu bázika foin na’in-ida (1), ensinu sekundáriu mós foin na’in-ida (1), ensinu superiór na’in-10 ona,” nia informa.

Notísia relevante: 2024: MACLN atribui bolsa estudu ba veteranu nia oan 1.300

Venâncio Lafo, konfirma, kritériu prinsipál atu asesu bolsa estudu ne’e, tenke mai ho karta rekomendasaun hosi diretór eskola, kompleta ho valór kaderneta eskolár 2023 nian.

Tuir mai kompleta mós ho dokumentu sira, hanesan sertidaun batizmu no RDTL, kartaun eleitorál, billete identidade, konta bankária ba ensinu sekundáriu, ba primeiru siklu ensinu báziku uza konta bankária inan-aman nian.

“Kona-bá rezultadu atu aprovadu ou la’e, depende hosi valór estudante sira-nian, ho dokumentu sira tenke kompleta, tanba prosesu verifikasaun no avaliasaun sei halo iha Díli, la’ós iha munisipíu,” nia katak.

Nia apela ba estudante sira-ne’ebé iha interese atu hola parte iha oportunidade ne’e, tenke prienxe kritériu sira, katak, veteranu no mártir nia oan, kompleta ho dokumentu komprovativu sira.

Notísia relevante: Estudante 164 hosi Oé-Cusse sai kandidatu asesu bolsa estudu veteranu

Entretantu bazea livru 3-C, Orsamentu Jerál Estadu (OJE) 2023 RAEOA-ZEESM Timor-Leste nian, haktuir benefisiáriu ne’ebé hetan apoiu osan Estadu iha RAEOA ba kombatente ka veteranu libertasaun nasionál hamutuk ema na’in-363, no mártir libertasaun nasionál hamutuk ema na’in-223.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!