iklan

EDUKASAUN, POLÍTIKA

PN apresia Governu implementa teste eskrita eletrónika ba vaga bolsa rekrutamentu

PN apresia Governu implementa teste eskrita eletrónika ba vaga bolsa rekrutamentu

Teste Eskrita Eletróniku ba Bolsa Kandidatu Manorin, iha salaun Komisaun Komisaun Funsaun Públika, kuarta (15/03). Imajen Tatoli/Egas Cristovão.

DILI, 18 marsu 2024 (TATOLI)—Parlamentu Nasionál (PN) lihosi Vise Prezidente Komisaun G trata asuntu Edukasaun, Juventude, Desportu no Kultura, Deputadu Gabriel Soares, apresia ba IX Governu Konstituisionál ne’ebé foin dahuluk implementa teste eskrita eletrónika ba vaga bolsa rekrutamentu (kandidatu) ba profesór sira.

Notísia Relevante: PM dejeza kandidatu profesór 13.021 tuir ezame eskrita labele lakon esperansa

“Hato’o apresiasaun boot ba IX Governu ne’ebé mak lideradu hosi Xanana Gusmão ne’ebé pela primeira vez ita-nia indepedénsia hahú ho teste ida ba kandidatu funsionáriu sira liuliu iha Ministériu Edukasaun ne’ebé mak ita sempre temi bolsa rekrutamentu (ba kandidatu manorin na’in) 13.021,” nia hateten liuhosi reuniaun plenária PN, segunda ne’e.

Tuir nia, teste ida-ne’e realiza di’ak tebe-tebes ne’ebé hetan lansamentu abertura iha sesta (15 marsu) liu ba no nia-parte mós akompaña iha ne’eba hodi haree direta katak Timor-Leste iha avansu ida ba oin.

Tanba, nia dehan, iha abertura ita haree Ministériu Edukasaun (ME) serbisu hamutuk ho Komisaun Funsaun Públika (KFP) sira hala’o preparasaun ne’ebé di’ak tebes no preparadu hodi fó teste ba bolsa rekrutamentu ba profesór sira tuir teste eletróniku ne’ebé kada oras rua sei akumula  kandidatu 150 no loron ida halo teste ba kandidatu 600.

“Parabéns ba Governu IX no parabéns ba Ministériu Edukasaun no Funsaun Públika,” nia dehan.

Vise Ministru ba asuntu Parlamentár, Adérito Hugo da Costa, hateten kona-ba bolsa kandidatu nian ba asuntu manorin na’in sira-nian realiza ona iha semana kotuk teste eletróniku ho kandidatu 13.021 ne’ebé kompete no prosesu ne’e lao hodi hele prienxe ba eskola sira ne’ebé menus manorin na’in.

Notísia Relevante: Aplikante bolsa rekrutamentu ba profesór 13.021 admitidu atu tuir teste eskrita

Jornalista : Nelson de Sousa

Editór        : Canio Ximenes

iklan
iklan

Leave a Reply

iklan
error: Content is protected !!