DILI, 20 marsu 2024 (TATOLI)— Ministru Agrikultura, Pekuária, Peska no Floresta (MAPPF), Marcos da Cruz, infroma daudaun ne’e Komisaun Nasionál Aprozionamentu (CAN-sigla portugés) halo ona konkursu públiku ba projetu konstrusaun irrigasaun Uatuwa no Irabere, atubele konstrui iha tinan ne’e.
“Ha’u aprezenta ona orsamentu ba Konsellu Ministru no hetan ona aprovasaun ne’ebé hahú loke prosesu konkursu públiku ba irrigasuan Irabere. Tanba ne’e prosesu konkursu públiku ne’e ami entrega ba Komisaun Nasionál Aprovizionamentu (CAN-sigla portugés) maka loke prosesu. Tanba tuir planu konstruisaun barajen ba mota irrabere ne’e sei konstrui iha tinan ida-ne’e”, Minsitru Marcos informa asuntu ne’e bainhira halo observasaun direta ba irrigasaun Irabere iha Viqueque.
Notísia relevante:Governu autoriza despeza ba konstrusaun irrigasaun Uatuwa no Irabere
Governante ne’e esplika irrigasaun ida-ne’e sei kobre ba postu rua hanesan Iliomár-Lautem no Uatucarbau-Viqueque ho natar purvolta ektare 400- resin ho nia orsamentu millaun $7 atubele kosntrui barazen atu hasa’e volume bee ba natar laran. Tanba barajen ne’e sei konstrui iha mota laran ho nia naruk metru 200.
Nune’e, Ministru Marcos espera fulan oin prosesu konkursu públiku bele konklui ona hodi bele hahú halo konstrusaun ba irirgasaun ne’e.
Governu mós tau atensaun hela atu halo moru protesaun ida iha mota Kainunu atu mota tun labele estraga tan agrikultór sira-nia natar.
“Ita hatene udan boot mota estragu ita-nia agrikultór sira-nia natar.Nune’e ha’u orietna tékniku sira mai haree hodi kria dezeñu ba moru protensaun nian”, nia afirma.
Alende ne’e, MAPPF mós detaka ona ekipamentu ba natar Ketanara ho ektare 14 iha suku Vessoru, postu Uatulari hodi normaliza irrigasaun no hamoos mota hodi labele estragu agrikultór sira-nia natar.
Konsellu Ministru delibera hodi autoriza halo despeza relasiona ho kontratu konstrusaun projetu irrigasaun Uatuwa-Modobuti, iha munisípiu Baucau ho valór millaun $26,57, no kontratu ba konstrusaun projetu irrigasaun Irabere, iha suku Irabin de Baixo, iha munisípiu Viqueque ho valór millaun $11,96.
MAPPF mós tau ona prioridade iha tinan 2024 ne’e hodi halo konstrusaun ba irrigasaun boot tolu hanesan Maliana II iha Bobonaro, Vatuva iha Baucau no Irabere iha Viqueque.
Aleinde ne’e, MAPPF mós kontinua projetu harii irrigasaun rua hanesan Lavai iha Lautém no Galata iha Baucau, ne’ebé nia kustu millaun $18. Projetu rua ne’e hahú prosesu aprovizionamentu iha tinan 2023.
Irrigasaun ne’ebé eziste iha Timor-Leste hamutuk 27, ne’ebé hosi númeru ne’e 11 mak hadi’a ona liuhosi Programa Nasionál ba Dezenvolvimentu Suku no hosi parseiru sira hanesan Ajénsia Kooperasaun Internasionál Japaun, Departamentu Negósiu Estranjeiru no Komérsiu Austrália no parseiru seluk tan.
Autoridade Uatucarbau agradese MAPPF
Administradór postu Uatucarbau, munisípiu Viqueque, Alfredo Santos, agradese ba Governu liuliu Ministériu Agrikultura, Peska, Pekuária no Floresta (MAPPF) tanba bele mai direta hodi observa ba kanal irrigasaun husi mota Irabere liga ba natar Baidubu.
“Ha’u lori povu Uatucarbau nia naran agradese ba Ministru Marcos da Cruz ho ninia Diretór sira ne’ebé hakat mai ami-nia postu, hodi haree kondisaun kanal irrigasaun iha mota Irabere ne’ebé kada tinan-tinan mota sempre estraga beibeik, nune’e difikulta ba ita-nia agrikultór sira,” nia agradese.
Ho vizita ne’e, Autoridade ne’e espera katak bele halo konstrusaun iha tinan ne’e, atubele fasilita povu agrikultór sira halo natar.
Iha fatin ketak, Agrikultór husi suku Vessoru, postu Uatulari, agradese MAPPF ne’ebé destaka ekipamentu pezadu ho normaliza mota no hadi’a irrigasaun ne’ebé rai taka bee dalan ba natar iha Keta-Naran ho ektare 20.
“Ami senti kontente tanba Governu apoia ami hodi normaliza mota ne’ebé estraga ami-nia natar no hamoos bee dalan hodi kanaliza bee ba ami-nia natar,” agrikultór ne’e agaradese.
Iha postu Uatulari, nia dehan natar purvoltár ektare 20 maka sei ativu, maibé natar kuaze ektare 200 mak abandonadu tanba irrigasaun aat.
Notísia relevante:La’o Hamutuk preokupa Governu la prioritiza setór produtivu iha OJE 2024
Jornalista: Vitorino Lopes da Costa
Editór : Florencio Miranda Ximenes
