DILI, 26 marsu 2024 (TATOLI)—Institutu Nasionál Kombate HIV/SIDA, Institutu Públiku (INCSIDA, I.P) identifika katak moras HIV/SIDA afetadu barak liu ba ema ho idade 40 ba leten, tanba ne’e institutu kontinua halo sensibilizasaun ba entidade relevante sira.
“Tuir estatístika, hatudu katak ema ho idade 40 to’o 60 mak afetadu moras HIV/SIDA ne’e. Entaun ita hateten sé mak sala, joven ka ema boot, nune’e mai ita hamutuk kombate moras ne’e liuhosi sensibilizasaun,” Prezidente INCSIDA, I.P, Daniel Marçal, hateten, hafoin halo sensibilizasaun informasaun ba estudante Eskola Ensinu Sekundáriu Jerál (ESJ) 04 UNAMET Dili, tersa ne’e.
Nia konsidera, bainhira moras ne’e da’et ba ema boot sira, maka fasil da’et mós ba inan no oan sira.
Institutu rejista kazu HIV/SIDA to’o iha Setembru 2023 hamutuk 2.000-resin ona, ne’ebé hosi kazu ne’e barak liu iha Dili 1.507, depois tuir mai mak Bobonaro 113, Covalima 95, Oé-cusse 62, Baucau 53, Ermera 35 no Ainaro 33.
“Tanba ne’e, ami halo sensibilizsaun ba eskola sira iha territóriu hodi bele evita halo sexu livre no ransu livre sira. Ami kontinua halo sensibilizasaun ida-ne’e ba joven sira, liu-liu ba estudante sira. Hahalok hirak ne’e ninia konsekuénsia mak ema balun afetadu vírus ne’e, iha balun ne’ebé tenke isin-rua lalais no ikus bainhira família la konkorda soe bebé. Tanba kuandu inan, aman no oan afetadu moras ne’e mak loron-ida timor-oan sei afeta ba moras referidu ne’e,” nia akresenta.
Notísia relevante : Deputada PD husu Governu atende kazu HIV-SIDA ho sériu
Tanba ne’e, atividade sensibilizasaun ne’e hodi estudante no joven sira bele prepara-an atu moris ho hanoin ne’ebé maduru no labele estraga sira-nia an iha futuru tanba joven mak autór ba dezenvolvimentu nasaun nian.
Iha fatin hanesan, Diretór Eskola ESJ 04 Setembro UNAMET, Martinho de Menezes, hateten, atividade ne’e bele muda mentalidade estudante ba ransu livre iha sosiedade.
“Tanba ne’e ha’u husu ba estudante sira katak tenke atensaun hodi simu informasaun ligadu ho moras HIV/SIDA ne’ebé ita-nia ekipa hosi INCSIDA oferese tanba liuhosi ida-ne’e mak ita bele kombate moras ne’e, nune’e iha futuru bele moris hanesan ema ida di’ak,” nia tenik.
Aleinde ne’e, estudante sira presiza iha koñesimentu kona-ba moras HIV/SIDA tanba moras ne’e fasil daet.
Nune’e mós, Estudante Eskola ESJ 04 Setembru, Bárbara Letícia Soares, agradese ba ekipa ne’ebé fó formasaun tanba bele sai bukae no bele prevene-an hosi moras.
Jornalista : Osória Marques
Editora : Julia Chatarina
