iklan

POLÍTIKA

PN aprova projetu-lei Rejime Jurídiku Exersísiu Direitu Petisaun iha faze jeneralidade

PN aprova projetu-lei Rejime Jurídiku Exersísiu Direitu Petisaun iha faze jeneralidade

Parlamentu Nasionál (PN) liuhusi reuniaun plenária aprova projetu-lei númeru 3/VI(1a)-Rejime Jurídiku Exersísiu Direitu Petisaun iha faze jeneralidade ho votu afavór 48, kontra no abstensaun zero, Tersa (26 marsu 2024). Imajen/Tatoli

DILI, 26 marsu 2024 (TATOLI)—Parlamentu Nasionál (PN), tersa ne’e, liuhusi reuniaun plenária aprova  projetu-lei númeru 3/VI(1a)-Rejime Jurídiku Exersísiu Direitu Petisaun iha faze jeneralidade ho votu afavór  48, kontra no abstensaun zero.

Notísia Relevante: JSMP apresia PN inísia projetu-lei Rejime Jurídiku Exersísiu Direitu Petisaun

“Nune’e projetu-lei ne’e pasa iha jeneralidade,” Prezidente Interina no atuál Primeira Vise Prezidente PN, Maria Teresinha Viegas, fó sai iha sala plenária PN.

Ho aprovasaun ne’e, meza PN haruka hikas projetu-lei ne’e ba komisaun A trata asuntu Justisa no Konstitusionál hodi kontinua trata iha diskusaun espesialidade, atu diskute espesífiku kada artigu no hato’o relatóriu paresér.

Tuir Rejimentu Parlamentu Nasionál (RPN) iha artigu 105.º inísiu diskusaun iha jeneralidade foka ba prinsípiu no sistema projetu ka proposta-lei ida-idak nian.

Iha relatóriu paresér komisaun A ba projetu-lei ne’e ho kondisaun bele ajenda diskusaun no votasaun iha jeneralidade.

Iha preambulu projetu-lei ne’e katak, funsionamentu no dezempeñu ba kualkér PN aprofunda no konsolida ho exersísiu forte asaun sidadania, ka ho reforsu partisipasaun sidadaun nia moris iha aspeitu oioin iha nasaun, ho mediasaun ka intervensaun Parlamentu, nune’e petisaun nu’udar instrumentu previlejiadu ba exersísiu sidadania.

Infelizmente ordenamentu jurídiku Timor-Leste la dispoen, ho ida-ne’e lei ne’ebé estabelese Rejime Jurídiku ba Exersísiu Direitu Petisaun atu mellora kompreensaun, abordajen no exersísiu direitu petisaun.

Deputadu proponente ba inisiativa ne’e entende Parlamentu presiza aprova lei espesífika define konseitu, prosedimentu, prinsípiu no regra espesífika hodi apoia figura jurídika ne’ebé konsagra iha konstituisaun artigu 48.

Iha Rejimentu Parlamentu Nasionál (RPN) artigu 155 no 160, nu’udar instrumentu mediasaun entre Estadu no sosiedade sívil ho rápidu no efikas ho mekanizmu instituisionál, partikularmente bainhira iha dimensaun partisipasaun polítika ka interrese jerál.

Efetivamente, konferidu husi sidadaun direitu individuál ka koletiva, ezije órgaun soberania ka autoridade públika sira hotu (esesaun ho Tribunál) defeza sira-nia direitu ka interrese, proteje husi konstituisaun ka lei sira, husi forma petisaun, keixa ka reklamasaun.

Projetu-lei ne’e husi Kapítulu I Ámbitu no Dispozisaun Jerál ho nia artigu walu, Kapítulu II Rekezitu formais no prosedimentu ho artigu ualu (8).

Kapítulu III Petisaun dirije ba Parlamentu Nasionál ho artigu 12, Kapítulu IV Dispozisaun finál ho artigu rua.

Projetu-lei ne’e aprezenta husi Deputadu proponente Joaquim dos Santos, António Moniz Calau, Abilio Quintão Pinto (FRETILIN), Patrocinio dos Reis Fernandes, Albino da Silva, Romeio Moises (CNRT), Alexandrino Afonso Nunes (PD).

Antes ne’e, komisaun A trata asuntu Justisa no Konstituisionál, konvida entidade relevante hanesan Ministru Prezidénsia Konsellu Ministru (PCM, siglá portugés), Ministéiru Justisa, Prokuradória Jerál Repúblika, Provedoria Direitu Umanu no Justisa (PDHJ, siglá portugés), sosiedade sívil no reprezentante advogadu hodi hala’o audénsia públika rona hanoin ba projetu-lei ne’e.

Prezidente komisaun A, Patrocinio dos Reis Fernandes, hateten ita durante ne’e seidauk iha lei kona-ba direitu petisaun, realmente konstituisaun artigu 48 asegura fó espasu ba sidadaun hotu-hotu atu ezerse sira-nia direitu petisaun.

Nune’e mós, rejimentu PN fó espasu ida-ne’e no durante ne’e PN simu hela  petisaun no reklamasaun sira, maibé laiha lei atu orienta andamentu.

Tan ne’e, projetu-lei ne’e atu define didi’ak bainhira mak buat ruma tama mai ne´e konsidera hanesan petisaun ka reklamasaun ka keixa, ne’e presiza atu define no regulariza iha lei ruma.

Nune’e, Deputadu sira iha komisaun A halo inisiativa ida aprezenta projetu-lei ne’e hodi hamosu lei ida kumpre ba artigu 48 iha konstituisaun hodi define no regulariza didi’ak sidadaun  sira oinsá ezerse sira-nia direitu petisaun.

Vise Ministru ba asuntu Parlamentár, Adérito Hugo da Costa, hanesan reprezentante Governu liuhusi Ministru PCM apresia inisiativa ne’e, tanba espasu ida ba direitu petisaun sidadaun nian vakum ka maluk hela iha tinan hirak nia laran kuandu konstituisaun artigu 48 fó direitu ida-ne’e ba sidadaun hotu atu hato’o sira-nia petisaun.

“Pozisaun Governu fó apresiasaun ba inisiativa ne’e di’ak tebe-tebes Timor-Leste nu’udar Estadu direitu demokrátiku,” nia hateten.

Nune’e mós inisiativa ne’e mai ko’alia kona-ba petisaun ne’ebé mai husi sidadaun estranjeiru ne’ebé la’ós ba direitu polítiku, maibé sira-ne’ebé hala’o nia kna’ar ruma, ida-ne’e iha mós espasu atu hato’o petisaun liuliu mai PN no PN iha mekanizmu própriu oinsá simu petisaun.

Notísia Relevante: Komisaun A halo audiénsia ba projetu-lei Rejime Jurídiku Exersísiu Direitu Petisaun

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!