DILI, 25 marsu 2024 (TATOLI)—Parlamentu Nasionál (PN) liuhusi Prezidente Komisaun F trata asuntu Saúde, Seguransa Sosiál no Igualdade Jeneru, Deputada Maria Gorumali Barreto, husu Governu liuhusi ministériu relevante atu foti asaun urjente hodi prevene virus Rabies (raiva) iha Timor-Leste.
Notísia Relevante: Timoroan ida mate ho virus Rabies iha HNGV
“Virus Rabies ne’ebé mak agora afeta makaas no iha semana kotuk ita hotu hatene akontese iha RAEOA, liuliu iha Passabe no Pante Makasar. Ne’e iha vila ona katak, virus Rabies liuhusi anjin gila (asu bulak) ne’e afeta makaas tebes ba iha komunidade. Tuir dadus to’o horse’ik rejista pasiente 21 ne’ebé asu tata no tuir teste laboratóriu nasionál hatudu Rabies pozitivu, ema na’in-rua mak konsege transfere mai HNGV, maibé na’in-rua mate hotu. Ida-ne’e, asuntu ne’ebé hatudu mai ita sériu tebes no presiza oinsá Governu atu bele tau atensaun urjente prevene lalais situasaun virus Rabies iha RAEOA hodi labele da’et mai territóriu laran tomak,” Prezidente Komisaun F ne’e levanta liuhusi reuniaun plenária PN, segunda ne’e.
Situasaun ne’e sériu no Governu da-sia (9) Konstitusionál liuhusi Ministériu Saúde, Ministériu Agrikultura ho entidade relevante seluk tenke foti asaun lalais hodi prevene no proteje populasaun.
Nia rekomenda ba Governu atu halo kontrola makaas iha liña fronteira terrestre no portu, no husu ba servisu integradu husi liña ministériu relevante prevene virus ne’e hodi labele hada’et ba populasaun sira iha RAEOA no territóriu.
Deputada KHUNTO, Irene Gonzaga, preokupa ho virus Rabies (raiva) ne’ebé akontese ihaOé-Cusse rejista ona pasiente mate, nune’e husu ministériu relevante tau atensaun sériu.
“Husu ministériu relevante atu kontrola asu ne’ebé komunidade hakiak hodi tau iha fatin ne’ebé di’ak tanba husik arbiru bele tata ema seluk, ida-ne’e afeta mós moras ne’e. Aleinde kontrola liña fronteira hodi labele lori virus tama mai Timor-Leste,” nia dehan.
Vise Ministru ba asuntu Parlamentár, Adérito Hugo da Costa, rejista preokupasaun Deputadu sira nian no sei hato’o ba ministériu tutela hodi tau atensaun.
Notísia Relevante: Asu hamutuk 13.223 mak hetan ona vasina kontra raiva
Jornalista : Nelson de Sousa
Editór : Cancio Ximenes
