iklan

EKONOMIA, HEADLINE, MUNISÍPIU, OÉ-CUSSE (RAEOA)

Empreza hosi Singapura investe millaun $600 atu dezenvolve otél Ambeno

Empreza hosi Singapura investe millaun $600 atu dezenvolve otél Ambeno

Prezidente Autoridade RAEOA, Rogério Tiago Lobato, selebra akordu ho empreza Maryoung Ltd iha Oé-Cusse. Imajen Tatoli/Abílio Elo Nini.

OÉ-CUSSE 27 marsu 2024 (TATOLI) – Empreza ida hosi nasaun dezenvolvida Singapura, kuarta ne’e asina akordu ho Prezidente Autoridade Rejiaun Administrativa Espesiál Oé-Cusse Ambeno (RAEOA). Iha akordu ne’e empreza hakarak investe millaun $600 hodi dezenvolve otél Ambeno sai famozu iha mundu.

Nune’e, Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, apresia ho investidór ka empreza Maryoung internasionál hosi nasaun Singapura.

Otél Ambeno daudaun ne’e lokaliza iha bairru Oé-Upun, aldeia Sanane, suku Costa, sub-rejiaun Pante Makasar, ne’ebé konstrui iha mandatu Prezidente Autoridade RAEOA dahuluk, Mari Alkatiri.

Prezidente Autoridade RAEOA, Rogério Tiago Lobato, selebra akordu ho empreza Maryoung Ltd iha Oé-Cusse. Imajen Tatoli/Abílio Elo Nini.

“Investidór ida mai hosi Singapura, primeira vez sira hakarak mai atu investe iha otél, oras ne’e ita iha otél Oé-Upun ne’e, horisehik ha’u ho sira ba ona otél ne’e, purtantu Estadu halo dezagrasaun ne’e boot tebes, maibé investidór ne’e mai ho númeru konkretu, tanba sira hakarak investe millaun $600 iha otél ne’e no sira hakarak halo boot liután,” Rogério Lobato, ba jornalista sira  hafoin enkontru.

Notísia relevante: Empreza hosi Xina hakarak investe setór turizmu no ospitalidade iha Oé-Cusse

Rogério Lobato, konsidera akordu ne’e inisiativa di’ak, hanesan ema investidór hakarak mai investe iha Oé-Cusse, nu’udar Autoridade tenke simu no enkoraja, tanba Oé-Cusse presiza dezenvolve setór privadu la’ós de’it nasionál maibé internasionál nune’e bele kria kampu traballu ba Oé-Cusse oan sira.

Prezidente Autoridade ne’e, esplika, selebrasaun akordu ne’e, empreza hanesan hatudu sira-nia interese barak, tanba sira hakarak investe iha agrikultura, ospitál no área oinoin, maibé sira hakarak komesa ho buat ida konkretu, ne’e mak otél ne’e.

“Ne’ebé ohin ne’e memoramdu (akordu) de’it, maibé kuandu buat hotu loos ona, tanba ne’e millaun $600, sertamente ha’u tenke lori ba Primeiru Ministru bele aprova liuhosi Konsellu Ministru, maibé bainhira konstrusaun ne’e hahú, tenke asina kontratu, nune’e saida mak RAEOA tenki halo, tenki fó no saida mak sira tenke halo,” nia akresenta.

Notísia relevante:RAEOA enkontru ho ajénsia haat hosi ONU haforsa projetu ‘Hamutuk bá Igualdade’

Jestór empreza Maryoung Internasionál Ltd, Prof Wang, agradese ba Autoridade RAEOA, tanba bele simu hodi selebra akordu ofisiál ne’e nu’udar faze inísiu ba futuru investimentu.

“Oé-Cusse sei sai sidade koñesidu (famozu) ida iha mundu, tán ne’e ami hakarak investe uluk iha otél besik aeroportu Rota do Sândalo, ami kompleta ona planu ba investimentu ida-ne’e, tanba ne’e da dala uluk, ami hakarak asina kontratu ho Governu,” nia orgullu.

Entretantu atu rekorda fali katak, iha loron 28 setembru 2023 Empreza Maryoung Internasionál Ltd, selebra akordu mós ho Autoridade RAEOA sesante, atu investe iha setór turizmu no agrikultura iha Oé-Cusse.

Notísia relevante: RAEOA selebra akordu ho empreza Moryoung Ltd atu investe iha setór turizmu no agrikultura

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!