iklan

NASIONÁL, EKONOMIA, HEADLINE

Governu estende kontratu projetu manutensaun estrada Baucau-Viqueque

Governu estende kontratu projetu manutensaun estrada Baucau-Viqueque

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (27/03/2024). Imajen Tatoli/Francisco Sony

DILI, 27 marsu 2024 (TATOLI)Governu liuhosi reuniaun ordinária Konsellu Ministru (KM), kuarta ne’e, aprova proposta ne’ebé aprezenta husi Ministru Obra Públika, Samuel Marçal, kona-ba adenda kontratu ba projetu konstrusaun estrada.

“Adenda kontratu ICB/046/MOPTC/2017, kona-ba estensaun períodu konstrusaun ba projetu melloria no manutensaun estrada liga munisípiu Baucau bá postu administrativu Venilale to’o munisípiu Viqueque. Lote 2 Venilale – Viqueque (Sta 27+120 – 62’101) sei implika estensaun prazu kontratuál to’o loron 29 Juñu 2024,” Vise-Ministru Asuntu Parlamentár, Adérito Hugo da Costa, ralata hafoin reuniaun ezekutivu, iha Palásiu Governu.

Notísia relevante : MOP koordena ho empreza CRIG-COVEC normaliza estrada Lugatoi Viqueque

Governante ne’e dehan, progresu fíziku ba projetu ne’e atinje liu ona 80%, atu kontinua to’o finalizasaun maka Governu deside estende hodi termina obra ne’e.

Adenda kontratu seluk RFP/003/MOP-2018 kona-ba estensaun kontratu servisu supervizaun ba obra hadi’a estrada entre Baucau-Venilale-Viqueque. Lote 2 Venilale–Viqueque (Sta 27+120 – 62’101) sei implika kustu adisionál ida ho valór kontratu rihun $903 no estensaun prazu kontratu to’o loron 30 Juñu 2025.

Enkuantu, LIB-001-MOPTC-2018 kona-ba konstrusaun estrada kilómetru 2,5 tan iha projetu reabilitasaun no manutensaun ba estrada munisipál sira, pakote 2 sesaun Bazartete-Tokoluli (Sta. 16+02 – Sta. 32+045) sei implika kustu adisionál ho valór millaun $1,55 no estensaun prazu kontratu ba loron-184.

“Konstrusaun estrada ne’e ninia orsamentu mai hosi orsamentu empréstimu, ne’ebé ninia progresu fíziku atinje ona 80% maibé haree iha terrenu presiza estensaun ba distánsia hodi kompleta,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!