COVALIMA, 02 Abríl 2024 ( TATOLI) – Prezidente Autoridade Munisípiu (PAM) Covalima, Miguel Armada Cardoso, orienta Servisu Munisipál Planeamentu Integradu no Dezenvolvimentu (SMPID) hodi aselera implementasaun projetu ualu iha munisípiu referidu.
Iha 2024, Planu Dezenvolvimentu Integradu Munisipál implementa projetu ualu ne’ebé nia orsamentu hamutuk millaun $1,4. Tipu projetu ne’e mak konstrusaun muru haleu Servisu Munisipál Obra Públika no Transporte ho osan $83.440,47, rezidénsia ba médiku iha suku Holpilat $473.657,35, harii salaun enkontru postu administrativu Fohorem $132.923,43, no rekonstrusaun jadín fatin turizmu iha Lakirin, iha postu Maucatar $55.798,80.
Aleinde ne’e, konstrusaun laboratóriu ba Sentru Saúde Komunitáriu (SSK) Zumalai, iha suku Zulo $87.022,60, harii Eskola Bázika Filiál iha suku Matai, postu Maucatar $87.931,39, konstrusaun kanál irrigasaun Bauraikun iha aldeia Kulu-oan, suku Tashilin, postu Zumalai $192.141 no harii merkadu, iha suku Camnasa, postu Suai $137.278,18.
“Ha’u fó hanoin ba diresaun SMPID iha Covalima no diresaun aprovizionamentu atu aselera implementasaun projetu ualu, nune’e nia progresu bele la’o ona”, PAM Covalima hato’o iha Sukaer-laran, ohin.
Diretór SMPID, Carlito Barros Reis, responde katak sira hein atu implementa projetu referidu ne’ebé nia prosesu iha hela aprovizionamentu, tanba sira mak loke konkursu públiku hodi fó oportunidade ba empreza atu submete sira-nia dokumentu.
Carlito Reis salienta katak SMPID halo kontrolu ba empreza sira sira no daudaun sei hein karta autorizasaun husi PAM atu hahú implementa projetu ualu no prosesu loke konkursu públiku iha parte Diresaun Aprovizionamentu nian.
Diretór Servisu Munisipál ba Aprovizionamentu, Roberto Alvaro Gomes, klarifika katak tuir lolos prosesu finaliza ona no anúnsia ona rezultadu prá-kualifikasaun, maibé tanba PAM foin simu pose iha Fevereiru ne’e no presiza hadi’a dokumentu anteriór tanba iha mak naran administradór sesante no diretór aprovizionamentu tuan nia naran.
“Nune’e, ha’u subemete ona karta-ida ba PAM. PAM mós hasai ona nia despaixu no ha’u mós prepara tan karta justifikasaun, nune’e prosesu bele hahú la’o ona. Ita espera aban hanesan ne’e bele hahú ona”, dehan.
Atu implementa projetu ualu ne’e, empreza ne’ebé selesionada iha prá-kualifikasaun iha nanis no nia rezultadu hein hodi halo klasifikasaun ba empreza hafoin bele loke fali konkursu públiku ba empreza 23.
“Tanba ne’e, hein de’it ona atu públika rezultadu prá-kualifikasaun foin loke konkursu públiku ba kompañia 23 bazeia ba sira-nia klasifikasaun A ho B, nune’e iha posibilidade ita sei implementa iha fulan ne’e”, nia esplika.
Notísia relevante: Autoridade Covalima sensibiliza matadalan ba elaborasaun PDIM
Jornalista: Celestina Teles
Editora: Maria Auxiliadora
