DILI, 04 abril 2024 (TATOLI)—Reprezentante povu iha Parlamentu Nasionál (PN) husu Ministériu Agrikultura, Peska, Pekuária no Floresta (MAPPF) atu halo intervensaun lalais ba peste gafañotu ne’ebé estraga agrikultór sira-nia plantasaun.
Deputadu membru komisaun D trata asuntu Ekónomia no Dezenvolvimentu, Antoninho Doutel Sarmento, husu MAPPF atu halo intervensaun lalais ba peste gafañotu ne’ebé estrada ona agrikultór sira-nia plantasaun hare ektare 250 no batar ektare 20 iha Aldeia Beilaku, suku Raimea, postu administrativu Zumalai, munisípiu Covalima.
Notísia Relevante: Agrikultór iha Beilaku lamenta tanba gafañotu estraga ona plantasaun ektare 270
Nia hateten, situasaun sira agrikultór hasoru iha baze, iha tempu udan sira bele kuda no kuidadu hahán ho di’ak atu bele kolleta mós hodi rezultadu di’ak, maibé la espera hetan atake makaas husi peste sira liuliu gafañotu iha fatin hotu-hotu ka territóriu laran, hanesan parte súl no norte hetan atake makaas.
“Ita-nia agrikultór sira lamenta ba peste ne’ebé halo atake makaas ba sira-ninia hare no batar, entaun oinsá mak Ministériu Agrikultura Peska, Pekuária no Floresta (MAPPF) ninia planeamentu no estratéjika foka ba intervensaun lalais hodi responde ba preokupasaun ne’e, ” nia hateten Agência Tatoli iha uma fukun Parlamentu Nasionál, kinta ne’e.
Reprezentante povu ne’e husu ministériu tenke alerta ba servisu MAPPF iha munisípiu sira hodi koordena ho estensionista iha baze hodi hetan dadus loloos ba situasaun ne’e, atu bele lalais kombate peste ne’ebé atake agrikultór sira-nia aihán liuliu iha territóriu ne’ebé daudaun afeta makas.
Tanba, nia dehan, situasaun ne’e la’ós foin akontese maibé dezde iha fulan-fevereiru ka marsu mai to’o daudaun ne e, nune’e presiza iha intervensaun lalais husi servisu estensionista sira.
Iha parte seluk, Deputadu FRETILIN ne’e mós husu ministériu atu bele kria kondisaun ba estensionista sira hanesan transporte hodi fasilita sira-nia servisu iha baze ho di’ak liután.
Entertantu, antes ne’e iha reuniaun plenária PN iha Deputadu balun mos levanta preokupasaun hanesan hodi husu ministériu kompetente atu tau atensaun.
Notísia Relevante: Gafañotu invade batar ektare 100 iha Covalima
Jornalista : Nelson de Sousa
Editór : Cancio Ximenes
