iklan

EKONOMIA, COVALIMA

Agrikultór iha Beilaku lamenta tanba gafañotu estraga ona plantasaun ektare 270

Agrikultór iha Beilaku lamenta tanba gafañotu estraga ona plantasaun ektare 270

Agrikultór iha aldeia Beilaku hala'o konferénsia ba imprensa kona-ba gafañotu estraga plantasaun sira. Imajen/Celestina Teles.

COVALIMA, 01 Abríl 2024 (TATOLI) – Agrikultór sira iha Aldeia Beilaku, suku Raimea, postu administrativu Zumalai, munisípiu Covalima preokupa tanba gafañotu estraga ona sira-nia plantasaun hare ektare 250 no batar ektare 20.

“Iha tinan ne’e ami labele hasa’e produsaun hare no batar tanba peste mak estraga plantasaun, la’ós agrikultor mak lakohi atu halai natar” , to’os-na’in Arcanzinha Soares hato’o preokupasaun liuhusi konferénsia imprensa, iha Zumalai, ohin.

Iha Covalima, iga suku Raimea, populasaun sira maioria moris ho vida agrikultór hodi halo to’os no natar, nune’e  kada tinan sempre hasa’e produsaun hare no batar, maibe tinan ida-ne’e bele mós fó impaktu ba falta produsaun. Tanba ne’e, agrikultór sira husu ba Governu hodi rega ai-moruk hamate gafañotu.

Ho peste ne’ebé estraga plantasaun, Arcanzinha Soares reforsa katak ida ne’e halo agrikultór-sira laiha vontade atu halai natar tanba sei laiha rezultadu. “Balun foin mak fila rai no balun foin prepara fini atu kuda, maibé fini hirak ne’e peste estraga hotu ona”, nia lamenta.

Xefe aldeia Beilaku, Crispim Gonzaga, dehan hato’o ona preokupasaun kona-ba kestaun ne’e ba estensionista hodi buka soluasaun hamutuk, maibé tékniku sira ne’e responde katak sira-nia parte hato’o  de’it relatóriu.

Ho nune’e, lidér lokál ne’e kontinua  ezije ba Governu atu solusiona lalais ho urjente hodi rega produtu kímiku ba gafañotu ne’ebé estraga komunidade nia plantasaun tanba lori triste bot ba agrikultór sira.

Diretór Servisu Munisipál Agrikultura Covalima, Lino Magno, hateten katak sira halo ona intervesaun hodi rega ai-moruk  darnovas  ba peste ne’e konsege hamate balun no restu kontinua invade plantasaun sira.

“Ami rega ai-moruk iha suku Raimea iha área  Haree-Kai , Selerena no Oebaba ba peste sira ne’ebé estraga plantasaun ektare tolu-resin, maibé iha área sira seluk seidauk  kobre hotu tanba Raimea ne’e área ne’ebe luan no agrikultor maioria halai natar”, nia salienta.

Dirijente ne’e dehan, nia fó nafatin orientasaun ba estensionista atu halo intervensaun rega darnovas hodi hamate peste ne’ebé estraga plantasaun no sira mós nafatin akompaña situasaun iha fatin referidu.

Notísia relevante: Gafañotu invade batar ektare 100 iha Covalima

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!