Gafañotu invade batar ektare 100 iha Covalima
DILI, 19 marsu 2024 (TATOLI) – Servisu Agrikultura munisípiu Covalima rejista batar ektare 100 iha Zumalai, Penerema no Oebaban daudaun ne’e hetan atake husi gafañotu.
Diretór Agrikultura Covalima, Lino Magno, relata katak insektu ne’e invade, semana ida ona, batar sira ne’e no ekipa agrikultura rega nafatin produtu kímiku, nune’e bele salva batar sira husi ameasa gafañotu nian.
“Ami orienta ona ekipa sira iha semana ida nia laran ne’e kontinua rega batar sira atu hamate gafañotu ninia dezenvolvimentu, tanba ita lahalo prevensaun lalais bele lakon produsaun batar iha Covalima”, Lino Magno informa ba Tatoli via telefone, ohin.
Ba kestaun ne’e, Agrikultura Covalima relata ona ba nasionál no tuir informasaun katak ekipa nasionál mós sei tun terrenu hodi apoia serbisu halo intervensaun ba atake gafañotu ba batar sira iha munisípiu refere.
“Ita simu ona informasaun katak ekipa Diresaun Nasionál Ortikultura orienta ona nia ekipa halointervensaun no sira iha ona dalan mai Covalima hodi mai reforsa serbisu minisipál ba kauza ne’e”, nia salienta.
Diretór Nasionál Ortikultura, Lúcio Oliveira, admite katak nia parte simu ona informasaun no ekipa nasionál aranka ona bá munisípiu atu halo intervensaun hodi hapara movimentasaun peste gafañotu ne’ebé ataka batar.
“Ita tenke halo duni intervensaun lalais. Se la’e, kuandu afeta ba munisípiu sira seluk difísil ona. Tanba agora gafañotu oan moris barak tan no ninia liras iha ona kuandu ita la rega lalais bele haksoit bá estraga tan batar sira seluk no ikus mai da’et to’o munisipiu sira seluk mós”, dehan.
Dirijente ne’e relembra katak, iha tinan kotuk, peste gafañotu ne’e hatudu ona nia movimentasaun iha Maliana ne’ebé halo agrikultór sira lakon totál sira-nian batar ne’ebé kuda. Ho esperiénsia ne’e maka Diresaun deside halo lalais intervensaun hodi tun bá hamutuk ho ekipa munisipál sira hodi rega ai-moruk ne’e ba batar sira.
“Agora ita haruka ona tékniku na’in rua ho ekipa sira husi Filipina uza tan ai-moruk AMO hodi bá rega atu reforsa tan ai-moruk EMA ne’ebé antes ne’e ita uza hodi rega ona ba peste sira ne’ebé ataka batar ho hare”, esplika.
Notísia relevante: Estoke produtu kímiku mamuk, peste lakataru estraga batar ektare rua iha Viqueque Vila
Jornalista: Tomé Amado
Editora: Maria Auxiliadora
