VIQUEQUE, 14 marsu 2024 (TATOLI)— Povu Agrikultór iha suku Caraubalo no uma Uain Kraik, Postu Administrativu Viqueque Vila, preokupa no sente triste tanba peste lakataru estraga sira nia batar ne’ebé kuaze ektare rua tanba estoke produtu kímiku mamuk iha munisipiu Viqueque.
“Iha tinan ne’e, ami sente triste tebe-tebes tanba ami-nia batar ne’ebé ami kuda kuaze peste lakataru estraga hotu. Ha’u-nia batar ne’e purvolta ektare rua resin. Maibé, ami laiha ai-moruk hodi oho peste sira-ne’e”, Agrikultór husi aldeia Basabein, suku Caraubalo-Viqueque, Bendita Ximenes da Menezes, hateten ba Agência TATOLI, I.P, iha suku Uma Uain Craik, kinta ne’e.
Notísia relevante:MAPPF prevee rihun $250 ba akizisaun produtu kímiku hodi kombate peste Lakataru
Situsaun ne’e, nia dehan bele difikulta sira nia moris lor-loron liuliu nesesita falímilia uma-laran tanba sira dependente ba to’os liuliu produsaun batar.
“Peste ne’e la’ós estraga ba ha’u-nia toos de’it, maibé ami-nia maluk sira-ne’ebé toos viziñu sira-nia mós. Ami haree de’it tanba ami laiha ai-moruk ruma hodi rega ba peste ne’e”, nia triste.
Nia kompara iha tinan 2023 peste ladun estraga, maibé tinan ida-ne’e pesta atake maka’as. Tanba ne’e, husu Ministériu Agrikultur, Peska, Pekuária no Floresta (MAPPF) hodi distribui ai-moruk peste nian atu bele hamate peste hirak ne’e.
Peste lakataru estraga povu agrikultór nia to’os sira ne’ebé lokaliza iha área Ratahu, aldeia Basabein, suku Uma Uain Kraik, postu Viqueque Vila.
Estoke ai-moruk peste lakataru mamuk
Ho problema ne’e, Responsavél Distribuisaun Ai-moruk Diresaun Planu Estesaun iha Servisu Agrikultór Munisípiu Viqueque, Cristiano Soares, hateten, daudaun esroke ai-moruk ba peste Lacataru hotu, nune’e servisu agrikultura munisípiu Viqueque haruka ona pedidu ba nasionál hodi husu ai-moruk Lacataru nian, maibé iha nasionál mós estoke hotu.
“Ami mós haree tinan ida-ne’e peste lacataru atake maka’as povu agrikultór sira batar kuaze iha Viqueque maioria. Nune’e ami haruka ona pedidu husu ai-moruk Lacataru nian ba nasionál, maibé iha nasionál mós estoke hotu”, nia afirma.
Tanba ne’e, nia husu ba povu agrikultór atu pasensia hodi hein ai-moruk peste iha mak bele distribui fali.
“Ita hein karik iha nasionál estoke ai-moruk ba Lacataru iha fali maka ita distribui ba agrikultór sira iha munisípiu Viqueque”, nia sujere.
Notísia relevante:Agrikultura Baucau sei halo prevensaun ba peste Lakataru
Jornalista : Vitorino Lopes da Costa
Editór : Florencio Miranda Ximenes
