Diretór ESJ 4 Setembru UNAMET husu ME atu prosesa lalais uniforme
DILI, 14 marsu 2024 (TATOLI)–Diretór Eskola Ensinu Sekundáriu Jerál 04 Setembru UNAMET Balide, Martinho de Menezes, husu Ministériu Edukasaun (ME) prosesa lalais uniforme (farda) ba estudante sira iha territóriu nasionál, atu nune’e fasil ba eskola ida-idak atu kontrola sira-nia estudante.
Notísia Relevante: ME prepara diploma ministeriál ba uniforme hodi labele hatodan inan-aman
“Ita husu ba ministériu se bele lalais ba, nune’e ita bele uza uniforme no ita bele kontrola ita-nia estudante rasik,” Diretór eskola ne’e hateten ba Agência Tatoli, iha nia kna’ar fatin, Balide, kinta ne’e.
Tuir nia, bainhira estudante ida hetan problema iha fatin públiku ka iha eskola ne’e rasik, responsável eskola bele koñese, tanba mai ho roupa baibain mak labele identifika estudante ne’e hosi eskola ne’ebé nian.
“Agora ita orienta estudante foun atu tau mutin ho metan maibé dala ruma mai ne’e tuir sira-nia hakarak de’it. Ita hein de’it desizaun hosi ministériu edukasaun. Ida-ne’e ami diretór eskola sira aprezenta ona ba ministériu katak bainhira labarik sira tuir ida-idak nian vontade mak bainhira mosu problema ruman eskola labele identifika no ezame primeiru periódu mós besik ona tanba ita-nia kalendáriu ba ezame monu iha 01 abríl ne’e,” nia dehan.
Eskola ne’e simu orientasaun ministériu edukasaun iha dezembru 2023 hasai despaisu katak uniforme farda ministériu mak prepara maibé to’o atu besik ezame seidauk iha. Estudante sira ne’ebé mak désimu anu uza roupa baibain de’it tuir sira-nia hakarak, eskola labeke hakaas sira, se lae profesór sala hotu.
Diretór Eskola Ensinu Tékniku Vokasionál 28 Novembru Becora, Manuel Amaral, hateten kona-ba uniforme ne’e hein de’it desizaun hosi Ministériu Edukasaun (ME) katak bainhira loos mak uza uniforme ne’e.
“Atu tama ona ba meadu marsu maibé eskola 28 Novembru Becora hein de’it desizaun hosi ministériu. Ami eskola tékniku vokasionál ne’e sistema ezame la hanesan ho eskola sekundáriu jerál seluk, tanba ne’e ba ami kona-ba uniforme ne’e di’ak hela. Ami hein de’it desizaun ikus hosi ministériu edukasaun nian,” nia dehan.
Nia hatutan, importante ba eskola mak profesór hanorin tuir regra ne’ebé mak estabelese ona, agora funiforme ne’e buat ketak ida no husik ministériu mak rezolve, eskola hein de’it labele ezije hela de’it tanba ida-ne’e la’ós eskola nia kompeténsia.
Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, hateten sirkulár hosi gabinte Sekretáriu Estadu katak agora deskute hela modelu farda ne’e, atu ME mak prepara ka inan-aman mak prepara seidauk iha diploma ida atu define ida-ne’e maibé ME dezeña hela farda nasionál.
Notísia Relevante: ME prepara diploma ministeriál ba uniforme hodi labele hatodan inan-aman
Jornalista : Osória Marques
Editór : Cancio Ximenes
