DILI, 12 fevereiru 2024 (TATOLI)–Portavós Gabinete Ministériu Edukasaun (ME), Filipe Rodrigues Pereira, hateten kona-ba uniforme ba estudante sira-ne’e daudaun ne’e gabinete jurídiku ministra edukasaun nian prepara ona diploma ida hodi labele hatodan inan-aman sira.
Notísia Relevante: ME sei diskute modelu uniforme ba estudante eskola públiku sira
“Maibé ho nia prinsípiu mak ne’e, ministériu sei koko nia esforsu atu uniforme ba eskola sira-ne’e labele hatodan inan-aman sira hodi suku uniforme (farda) foun ruma ba nia oan sira ba eskola. Tanba ne’e, prosesu no mekanizmu atu hetan uniforme ne’e ministériu edukasaun sei tetu didi’ak atu lahamosu burokrásia boot luan atu hatodan inan-aman suku farda ba nia oan sira,” Portavós ne’e hateten liuhosi konferénsia imprensa iha salaun ME, Vila Verde, segunda ne’e.
Nia dehan, ministra hakarak buat kmaan no baratu, atu nune’e alunu sira hotu iha posibilidade hanesan hodi uza uniforme ba eskola no ME buka dalan no sei la hatodan inan-aman sira.
Uniforme inan-aman mak suku no ME mak prepara ka oinsá, nia hatán, ME mak suku ne’e burokrásia boot naruk ida maibé sei diskute hela tanba sei hakmaan inan-aman sei asesu ba uniforme ba eskola.
“Ita lakohi eskola sira iha ezijénsia barak hodi inan-aman labele haruka oan ba eskola, agora nia tais oinsá ne’e ita hein diploma ministeriál nian,” nia dehan.
Diretór Jerál Edukasaun no Ensinu, Deolindo da Cruz, hateten kona-ba uniforme daudaun ne’e ME ho nia gabinte apoiu jurídiku liuliu iha dirasaun jerál rua halo preparasaun namanas iha semana kotuk.
ME halo ona agregasaun téknika no sei presiza hadi’a tan buat balun ne’ebé ligadu ho ensinu sekundáriu tékniku vokasionál nian tanba uniforme iha ne’ebá ne’e iha oin rua.
“Ida mak ba serimónia ofisiál ka estudante sira uza iha loron bain-leet ba ensinu aprendizajen nian no ida fali uza ba prátika liuliu uza ensinu tékniku vokasionál nian ho nia modellu, presu, no regra uza nian no ida-ne’e ita deside ona semana kotuk,” nia dehan.
Aleinde ne’e iha mós asuntu balun ne’ebé presiza halo diskusaun kle’an atu nune’e asesór jurídiku sira bele haree no sei regula iha diploma ne’e atu fó sai, no tempu badak sei rona rezultadu maibé hafoin elaborasaun termina no ministra asina.
Nia dehan, mekanizmu kriasaun uniforme ne’e orsida diploma esplika kle’an oinsá modellu ba pre-eskolár tantu feto ho mane nian no ho kór saida, inklui mós ba ensinu báziku, to’o ensinu sekundáriu no ensinu tékniku volasionál entaun ida-ne’e presiza haree no halo diskusaun tan.
“Ita seidauk hatene kada eskola ne’e nia uniforme farda oinsá no ho kór, tanba hein diploma ministeriál hotu ministra asina depois ita halo sensibilizasaun uniforme ne’e ba kada munisípiu sira hotu hafoin implementa ka uza uniforme ne’e ba eskola,” nia hateten.
Jornalista : Osória Marques
Editór : Cancio Ximenes
