DILI, 05 janeiru 2024 (TATOLI)—Ministériu Edukasaun (ME) liuhosi Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, hateten daudaun ne’e Ministériu Edukasaun sei diskute hela modelu uniforme nasionál ba estudante ekola públiku sira iha territóriu nasionál, tanba seidauk iha diploma ministeriál ida atu define.
Notísia Relevante: ME mak sei prepara uniforme ba alunu eskola públika sira
“Agora diskute hela modelu farda ne’e. Ministériu Edukasaun (ME) mak prepara ka inan-aman mak prepara ne’e seidauk iha diploma ida atu define ida-ne’e. Maibé, Ministériu Edukasaun (ME) dezeña hela farda nasionál,” Governante ne’e hateten ba Agência Tatoli, hodi hatán ba Diretór Eskola Ensinu Bázika Sentrál (EBC) 10 Dezembru Comoro nia preokupasaun kona-baseidauk iha unifome nasionál no estudante foun kontinua hatais farda mutin-metan iha prosesu aprendizajen, hafoin serimónia graduasaun ba estudante Eskola Tékniku Informátika (ETI) iha Comoro, segunda ne’e.
Nia hatutan, uniforme nasionál ba estudante sira ne’e Ministériu Edukasaun mak sei define maibé tuir sirkulár hosi gabinte Sekretáriu Estadu Ensinu Sekundáriu Jerál no Ensinu Tékniku Vokasionál katak tipu kobransa saida de’it labele akonetse ba estudante sira iha eskola públiku sira iha territóriu nasionál,
Tanba ne’e, nia husu eskola públiku sira hotu katak desizaun hosi jerente eskola sira halo kobransa ba estudante sira atu suku uniforme (farda) ne’e, tenke devolve fila-fali osan ba estudante nia inan-aman sira.
Diretór Interinu Eskola Bázika Sentrál (EBC) 10 Dezembru Comoro, Nicolau Amaral, hateten tanba to’o oras ne’e Ministériu Edukasaun seidauk define kona-ba uniforme nasionál mak estudante foun sira iha EBC 10 Dezembru ne’e kontinua hatais farda mutin-metan iha prosesu aprendizajen.
Notísia Relevante: Implementasaun uniforme eskolár adia ba tinan oin
“Estudante iha ne’e hatais mutin ho metan durante semana ida no hein ho desizaun hosi Ministériu Edukasaun nian, tanba Ministériu Edukasaun mak kria uniforme ba eskola iha territóriu nasionál. Ita bazea de’it ba sirkulár ne’ebé Ministériu Edukasaun fó sai katak estudante foun ba tinan ne’e, ita halo kanselamentu hotu no osan estudante nian ita fó fila ona,” nia dehan.
Tuir nia, eskola ne’e iha uniforme (farda) oin tolu (3) ne’ebé hamutuk $48 hodi bele prepara ba estudante foun EBC 10 Dezembru ne’e hamutuk ema na’in-234, maibé eskola devolve antes kedas ona depois estudante foun tama eskola.
“Ita tuir de’it regulamentu ne’ebé iha, katak tinan ne’e ita sei simu uniforme nasionál hosi ministériu edukasaun. Ida-ne’e, ami iha eskola hein de’it desizaun, só ami halo de’it mak oinsá atu kontrolu ita-nia oan bainihira mosu dezentendimentu ruma hodi koopera ba edukasaun nasionál bainhira mak uniforme ba estudante sira-ne’e iha,” nia dehan.
Diretór Servisu Edukasaun Munisípiu Dili, Carlito da Silva hateten sirkulár ME fó sai katak bandu labele halo kobransa ba estudante ba suku farda maibé presiza iha preparasaun nune’e bele atende, se lae hanesan agora estudante foun ba anu leitivu tinan 2024 ne’e mai ho farda kór metan ho mutin.
“Ida-ne’e oinsá ita atu identifika, karik labarik halo problema ruma. Atu uniforme ho tais kada munisípiu ne’e presiza fera ulun, tanba kada munisípiu nia identidade la hanesan. Planu tais la batik ne’e sei di’ak maibé mak ho tais ne’e defísil, tanba presiza tempu mak bele halo hotu enkuantu estudante besik rihun-60,” nia esplika.
Notísia Relevante: MEJD deside kór uniforme ba estudante reprezenta identidade nasionál-kulturál
Jornalista : Osória Marques
Editór : Cancio Ximenes
