DILI, 09 fevereiru 2023 (TATOLI)–Ministru Edukasaun Juventude no Desportu (MEJD), Armindo Maia, hateten asuntu kona-ba farda nasionál ba estudante nivel eskolaridade iha territóriu nasionál hetan ona desizaun mai hosi identidade nasionál no identidade kulturál.
Notísia Relevante: MEJD planeia uniforme foun ba estudante sira iha territóriu nasionál
Ministru Edukasaun, Armindo Maia, hateten iha ona desizaun ba uniforme nasionál maibé nia la lembra kór sira maibé uniforme sira-ne’e sei reprezenta identidade nasionál no mós identidade kulturál Timor nian.
“Kór uniforme nasionál ba estudante sira ita define tiha ona. Maibé ha’u katuas ona ne’ebé ladún dekor ho didi’ak ninia kór sira,” Ministru Edukasaun hateten ba Agência Tatoli iha konferénsia Partidu FRETILIN nian ne’ebé hala’o iha salaun katedrál vila verde, foin lalais ne’e.
Governante ne’e haktuir katak desizaun ba uniforme nasionál ne’e iha ona ne’e duni semana agora nia sei hasai ona despaxu Ministeriál ida kona ba definisaun kritériu balun kona ba kór farda ba estudante sira iha territóriu nasionál ne’ebé reprezenta identidade nasionál (kór bandeira) no mós identidade kulturál (tais).
“Ita-nia farda nasionál ba estudante sira-ne’e sei reprezenta ita-nia identidade nasionál no mós identidade kulturál maibé sei haree mós ba nivel eskolaridade,” nia dehan.
Notísia Relevante: Diretór ESG UNAMET husu MEJD deside lalais uniforme ba estudante sira
Tuir observasaun Agência Tatoli iha terrenu hatudu katak, iha kapitál ne’e haree katak barak maka uza hela farda kór mutin no metan tanba ministériu bandu atu la bele suku farda molok desizaun Ministériu Edukasaun nian tuun.
Diretór Eskola Ensinu Sekundáriu Jerál (ESG) 04 Setembru Balide, Martinho Lopez, hateten estudante foun sira-ne’ebé tama iha tinan ida-ne’e kontinua uza hela sira-nia farda inklui farda metan-mutin hodi hein desizaun Ministériu Edukasaun nian.
Maibé, nia dehan, bainhira iha ona desizaun hanesan ne’e ba oin sira bele konsulta ona ho inan-aman sira atu prepara farda foun ba estudante sira.
Tanba, tuir nia, durante ne’e eskola preokupa makaas liu mak situasaun ruma akontese oinsá mak eskola bele kontrola estudante sira.
Ne’eduni eskola nafatin tau esperansa ba Governu liuhosi Ministériu Edukasaun bainhira iha ona desizaun ba uniforme nasionál bele orienta ona eskola iha territóriu nasionál atu prepara ona.
Notísia Relevante: MEJD sei foti medida ba eskola ne’ebé suku ona uniforme
Jornalista : Tomé Amado
Editór : Cancio Ximenes
