Top

MEJD planeia uniforme foun ba estudante sira iha territóriu nasionál

Estudante sira simu Prezidente Republika, Francisco Guterres Lú Olo bainhira vizita ba Eskola Sekundária Jerál Públiku (ESJP) Seran-Kotek, Munisípiu Covalima, Kinta (27/06/2019). Imajen TATOLI/Eugénio Pereira.

DILI, 12 dezembru 2022 (TATOLI) – Ministériu Edukasaun, Juventude no Desportu (MEJD), planeia ona uniforme foun ho nível nasionál ba estudante sira iha territóriu nasional.

“Ha’u husu ba eskola no inan aman sira atu para lai organiza malu atu suku farda foun ba oan sira tanba ministériu edukasaun iha ona planu atu kria uniforme nível nasionál ba eskola hotu iha territóriu nasionál tuir nível edukasaun ida-idak nian,” Diretór Jerál Edukasaun Ensinu, Luis Manuel Ximenes informa ba Tatoli iha Vila Verde, segunda ne’e

Tanba MEJD halo ona preparasaun atu kria uniforme nível nasionál ba estudante ensinu báziku, ensinu sekundáriu no ensinu tékniku vokasionál iha territóriu nasionál.

Tuir nia, uniforme nível nasionál ne’ebé Ministériu Edukasaun liuhosi Diresaun Nasionál Edukasaun Ensinu planeia ona ba tinan 2023 ne’e, define ona ninia kór maibé desizaun ne’e seidauk bele fó-sai tanba sei hein desizaun Ministru Armindo Maia.

DJ edukasaun ensinu ne’e esplika, uniforme nível nasionál ne’e ninia kór sei deside hosi Ministériu Edukasaun maibé sei iha diferensa uniforme nível nasionál kada nível no kada munisípiu.

Hosi kada munisípiu sei suku mós tais idak-idak nian iha kada uniforme ne’ebé ministériu deside ona atu nune’e ba futuru hakarak halo identifikasaun ba estudante ida bele haree hosi kór tais ne’ebé suku iha uniforme ne’e.

“Ezemplu estudante hosi Lospalos nian sira-nia uniforme sei suku mós motif tasi Lospalos nian iha uniforme refere atu nune’e ita bele halo identifika katak estudante ne’e hosi Lospalos nune’e mós ba munisípiu sira seluk. Ne’ebé estudante hosi kada nivel ida-idak sira nia uniforme sei la hanesan, ensinu báziku kór oin seluk, ensinu sekundáriu jerál oin seluk no ensinu sekundáriu tékniku vokasionál oin seluk,” nia katak.

Uniforme nível nasionál ne’ebé ministériu sei define ne’e mós laloos ministériu maka atu suku, maibé ministériu deside de’it kór ba nível ensinu báziku, ensinu sekundáriu jerál no ensinu sekundáriu tékniku vokasionál depois inan aman sira maka ba suku rasik.

Ministériu lakohi eskola sira atu simu fali osan hosi inan aman sira hodi ba suku farda ba alunu sira tanba papél profesór ka mestre sira nian atu hanorin.

Jornalista   : Tomé Amado

Editór         : Evaristo Soares Martins  

Publisidade

Leave a Reply

Latest Post

error: Content is protected !!