Agrikultura Baucau sei halo prevensaun ba peste Lakataru
BAUCAU, 09 janeiru 2024 (TATOLI) – Serbisu Munisipál Agrikultura Munisípiu Baucau, sei halo prevensaun ba peste Lakataru ne’ebé ataka batar agrikultór nian.
“Bainhira iha ona informasaun ami presiza halo levantamentu dadus nune’e bele identifika kauza hosi peste atake batar agrikultór nian,” Diretór Serbisu Munisipál Agrikultura Baucau hateten iha Vila Nova, tersa ne’e.
Agrikultór Baucau kada tinan sempre iha rezerva ai-moruk inklui halo levantamentu dadus relasiona ho peste Lakataru ne’ebé sempre atake batar no hare bainhira udan monu rai.
Ai-moruk ne’ebé prepara ba prevensaun mak hanesan tipu nipxinta no dursban inklui sosializa kona-ba tratamentu kompostu biolójiku hanesan utiliza ainamal seluk no tipu tradisionál hanesan kombate direita Lakataru.
Ai-moruk ba kombate peste Lakataru distribui direita hosi Ministériu Agrikultura, Peska, Pekuária no Florestrál nune’e Serbisu Munisipál Agrikultura Baucau hatoo deit lokalizasaun fatin kazu peste Lakataru.
“Ita lahalo pedidu estoke ai-moruk maibé direita hosi nasionál no ita halo jestaun de’it bainhira ai-moruk distribui ona mai,” Moisés Perreira akresenta.
Kauza hosi peste Lakataru atake batar tanba mudansa klimátika, liuliu udan monu rai la tuir tempu, liuliu área tasi too foho tanba loron manas hamosu Lakataru tolun, moris no subar aan iha batar.
Área ne’ebé risku iha munisípiu Baucau relasiona ho kazu Lakataru mak postu Baucau Vila tanba loron manas, enkuantu postu lima seluk udan ho intensivu normál nune’e ladún risku ba akontese peste Lakataru.
Jornalista : Natalino Belo
Editór : Evaristo Soares Martins
