DILI, 05 abril 2024 (TATOLI)—Parlamentu Nasionál (PN) sei bolu urjente Ministra Saúde (MS) ho Ministru Agrikultura, Peska, Pekuáriu no Floresta (MAPPF) hodi bele esplika medida intervensaun prevene moras Rabies (Raiva).
Notísia Relevante: PN husu Governu foti asaun urjente prevene virus Rabies
Primeira Sekretária Meza PN, Deputada Maria Teresa Gusmão, hateten PN liuhusi reuniaun líder bankada deside atu antesipa urjente hodi halo pedidu ba Ministra Saúde ho Ministru MAPPF atu mai órgaun soberania daruak ne’e, hodi halo esplikasaun ba iha membru PN kona-ba medida intervensaun prevensaun ba moras Rabies ne’ebé daudaun ne’e rejista ona kazu óbitu iha Oé-Cusse
“Sei halo karta pedidu ba membru Governu tutela, hodi bele mai halo esplikasaun ba PN, iha loron 09 fulan-abríl tinan ne’e,” nia hateten ba jornalista sira iha uma fukun PN, sesta ne’e.
Ho nune’e, iha audénsia públika ne’e bele rona prevensaun saida mak ministériu rua ne’e halo ba intervensaun moras Raibes ne’ebé rejista ona iha Oé-Cusse no mós sai preokupasaun ba povu Timor-Leste.
Tanba, tuir nia, moras Raibes bainhira lahalo prevensaun lalais hanesan vasinasaun ba animál no vasinasaun ba ema bele halakon ema-nia vida, tanba ne´e Governu presiza halo intervensaun sériu hodi labele alarga ba munisípiu seluk,
Notísia Relevante: Timoroan ida mate ho virus Rabies iha HNGV
Jornalista : Nelson de Sousa
Editór : Cancio Ximenes
