DILI, 08 abríl 2024 (TATOLI)–Reprezentante povu iha uma fukun Parlamentu Nasionál (PN), liuhosi Deputadu FRETILIN, Antoninho Doutel Sarmento, preokupa servidór Estadu balun kontinua utiliza karreta Estadu no motor ba interrese privadu iha loron feriadu hanesan sábadu no domingu.
Notísia Relevante: Ekipa konjunta halo apreensaun karreta Estadu 16 no motór 14
“Asuntu sirkulasaun karreta Estadu, iha sábadu no domingu, kauze laiha objetivu, tanba bainhira auto-stop husi ita-nia polísia tránzitu halo apreensaun ba karreta barak mak laiha guia da marca no balun tula fali buat sira seluk,” Deputadu Antoninho Doutel levanta liuhusi reuniaun plenária PN, segunda ne’e.
Nia dehan, ida-ne´e akontese iha Dili maibé iha postu administrativu sira parese karreta administrasaun nian mós uza ba sasán sira hanesan ne’e, dalaruma la’o laiha guia da marca husi prezidente autoridade munisípiu.
Ida-ne´e sai problema, tanba ne’e entende Governu deskontroladu no laiha sistema hodi regulariza no kontrola nia subordinadu utiliza veíkulu Estadu nian.
Tanba ne’e, membru hosi órgaun lejislativu ne’e, fó hanoin ba Governu atuál atu tuir nafatin polítika jestaun patrimóniu Estadu ne’ebé antes ne’e implementa ona iha Governu da-ualu, aplika tiha ona iha ninia mandatu husi rezolusaun kona-ba jestaun re-alokasaun veíkulu Estadu ba dekretu-lei númeru 21/2021, 10 novembru.
Nia dehan, iha funsionáriu balun lori karreta ba uma maibé loloos ne´e karreta uza de’it ba asuntu servisu no tenke para iha servisu fatin.
“Preokupa atu ho konsiénsia ne’ebé aposta ba iha jestaun ida-idak ho akontabilidade hodi labele prezudika no fó todan ba Estadu,” nia hateten.
Liuhusi reuniaun plenáira ne’e, Vise Ministru ba asuntu Parlamentár, Adérito Hugo da Costa, la hatan preokupasaun ne’e no rejista de’it no sei enkamiña ba ministériu tutela.
Notísia Relevante: Servidór Estadu kontinua utiliza veíkulu ba interrese privadu
Jornalista : Nelson de Sousa
Editór : Cancio Ximens
