DILI, 06 abríl 2024 (TATOLI)—Ekipa konjunta halo operasaun ba utilizasaun veíkulu Estadu husi servidór Estadu sira ne’ebé sirkula iha sábadu ne’e, ne’ebé konsege halo apreensaun viatura balun.
Ekipa konjunta kompostu husi Diresaun Nasionál Patrimóniu Estadu (DNPE), Komisaun Funsaun Públika (KFP), Komisaun Antí-Korrupsaun (CAC, siglá portugés), Polísia Nasionál Timor-Leste (PNTL) Unidade Tránzitu, Diresaun Nasionál Transporte Terrestre (DNTT) ho Inspesaun Jerál Estadu (IJE).
“Atividade ohin, oras rua nia laran de’it, evidénsia sira ne’ebé apreende iha karreta 16 no motór 14 ne’ebé laiha autorizasaun,” Komandante Tránzitu munisípiu Dili, Inspetór Afonso da Silva, relata hafoin ramata operasaun, iha edifísiu Patrimóniu Estadu, Balide.
Ekipa halo atividade operasaun liuhusi auto-stop iha estrada área Becora, Bidaun Largo Lecidere, Comoro no Balide, hodi identifika veíkulu Estadu ne’ebé sirkula laiha autorizasaun husi superiór ka laiha guia da marca.
Notísia relevante : Servidór Estadu kontinua utiliza veíkulu ba interrese privadu
Nune’e, ekipa konjunta sei kontinua atividade ne’e iha loron sábadu no domingu, inklui sirkulasaun liu oras serbisu no utilizasaun ba interese privadu.
Ekipa rai viatura Estadu ne’ebé konsege halo apreensaun iha patrimóniu Estadu. Aleinde ne’e, sei loke prosesu hasoru utilizadór no halo auto-notísia ba Ministériu Públiku (MP).
Operasaun konjunta ne’e bazeia ba dekretu-lei númeru 80/2022 kona-ba regulamentu viatura Estadu nian, dekretu-lei númeru 6/2003, 30 abríl kona-ba kódigu estrada, sirkulár númeru 003/GPM/111/2009 kona-ba jestaun tékniku karreta Estadu, sirkulár númeru 001/GPM/X/2012 kona-ba kontrola movimentu viatura Estadu no padraun prosedimentu operasionál.
Tuir observasaun Agência Tatoli iha terreru, nota katak servidór Estadu balun utiliza karreta Estadu iha loron sábadu ba interese privadu hanesan tula hela família no balun tula sasán husi Dili bá munisípiu, no laiha guia da marsa.
Jornalista : Nelson de Sousa
Editora : Julia Chatarina
