DILI, 10 abríl 2024 (TATOLI)-Prezidente Fundasaun Meskita An-Nur Timor-Leste Anwar da Costa, hateten sentidu hosi selebrasaun Idul Fitri tinan ne’e mak komunidade Musulmana Timor-Leste hakarak hametin pás, unidade no hametin toleránsia relijiaun.
“Sentidu Idul Fitri ba tinan ida-ne’e ba komunidade musulmana iha Timor-Leste mak pás, unidade hodi haree sosiedade ida ne’ebé dezenvolvidu iha pás nia laran. Labele iha konflitu. Labele iha interrese grupu. Esperansa ba oin mak ne’e, toleránsia entre relijaun iha Timor-Leste, tanba toleránsia entre relijiaun iha Timor-Leste kapas nafatin; ida ne’e la’ós foin maka ita hahú, maibé uluk kedan, husi kolonializasaun nia tempu mós entre ita Kristaun no Izlam ne’e laiha konflitu. Ida-ne’e maka ita atu mantein ba oin nune’e ita bele dezenvolve ita nia nasaun ba oin,” Anwar da Costa ba jornalista sira hafoin Sholat ba loron Idul Fitri tinan ne’ebé iha Meskita An-Nur Kampung Alor Dili, ohin.
Prezidente Fundasaun Meskita An-Nur Timor-Leste kongratula komunidade musulmana Timor-Leste tanba durante fulan-ida halo jezun ho di’ak no ohin ramata remata jezun ho di’ak.
“Ha’u hakarak hato’o parabéns ba komunidade sira musulmanu iha Timor-Leste ne’ebé mak ohin selebra Idul Fitri no loron Idul Fitri ohin ne’e tenke selebra ho kontente, pás nia laran; idak-idak nia fatin, hamutuk ho komunidade sira ida-ne’e mak importante,” nia kongratula.
Anwar dehan, iha selebrasaun loron Idul Fitri tinan ne’e komunidade musulmana Timor-Leste prevé osan 9.000-resin hodi selebra loron importante ne’e.
“Osan sira ne’e husi komunidade musulmanu Timor-Leste liuhusi sira-nia kontribuisaun ne’ebé mak hanaran Jakat no osan sira ne’e ami sei hola fali ai-han hanesan foos no sasan sira seluk hodi fahe ba maluk sira ne’ebé presiza ita-nia tulun,”nia adianta.
Nune’e mós, Prezidente Konsellu Kuradór Fundasaun Meskita An-Nur Timor-Leste Abdulah Said Sagran, realsa, ohin loron ne’e loron importante ba komunidade musulmana Timor-Leste tanba sira halo ona jezun durante fulan ida-nia laran ne’e nu’udar formasun atu halo mudansa ba sira-nia aan rasik.
“Idul Fitri ne’e hanesan parabéns ida ba sira ne’ebé mak kumpre jezun fulan ida, tanba sai vitória ba ita-nia aan rasik no Idul Fitri ne’e atu ita haksolok,” nia afirma.
Iha fatin hanesan, Komunidade musulmanu Timor-Leste Alfanso Lopez, kongratula komunidade musulmana Timor-Leste ne’ebé selebra loron Idul Fitri tinan-ne’e.
“Espera loron Idul Fitri ita hotu kontinua kria pás, estabilidade hodi kontribui ba dezenvolvimentu Timor-Leste nian,” nia konklui.
Jornalista: Natalino Costa
Editór: Rafael Ximenes de A. Belo
