OÉ-CUSSE, 09 abríl 2024 (TATOLI) – Ekipa Zona Espesiál Ekonómia Dezenvolvimentu Oé-Cusse Ambeno (ZEEDOA), lideradu João Mendes Gonçalves, tersa ne’e, hamutuk ho entidade relevante sira hahú elabora asuntu asuntu rua, kona-bá área turizmu no prezervasaun ba patrimóniu kulturál no jestaun área fronterístika, nu’udar programa prioridade ba investimentu ZEEDOA nian iha Rejiaun Administrativa Espesiál Oé-Cusse Ambeno (RAEOA).
“Área rua ne’e importante banhira elobarasaun konseitu nu’udar programa prioridade ba iha investimentu ZEEDOA nian,” João Mendes Gonçalves, ko’alia iha deskusaun elaborasaun ne’e, hala’o iha salaun IADE Oé-Cusse.
Notísia relevante:ZEEDOA avalia progresu Relatóriu Estadu Rejiaun iha faze finalidade
Durante iha sorumutu ne’e, parte ZEEDOA propoin asuntu haat ba veteranu, lidér komunitáriu, akadémiku no intelektuál sira, kontribui ideia ba pontu haat maka hanesan.
Dahuluk, nu’udar Oé-Cusse oan tenke prezerva nafatin nia patrimóniu kulturál, desde jerasaun ba jerasaun rai hela to’o ohin loron.
Daruak, saida de’it maka valór importante liu iha patrimóniu kulturál rain ho povu Atoni rasik, datolu, kona-bá kategorizasaun ba patrimóniu sosiál kulturál, ikusliu maka antisipasaun no reajustamentu saida maka sei akontese.
“Turizmu, relijioza hanesan Lifau, nu’udar odamatan Timor-Leste nian, bainhira misionáriu Igreja Katólika tama Timor-Leste presiza tau konsiderasaun hadi’a fatin ne’e, turizmu istória tanba Oé-Cusse nu’udar envolve mós iha illa timor hosi NTT mai to’o Timor-Leste, tanba saida maka hafahe iha momentu kolonializmu Portugál no Belanda, istória ne’e tenke prezerva,” João Mendes Gonçalves, ko’alia iha deskusaun ne’e.
Alende ne’e, turizmu kulturál ba prezervasaun tais Oé-Cusse nian nu’udar orijinál povu Atoni-nian, hosi uluk to’o agora, no presiza tau atensaun mós ba floresta, ai-kameli presiza dezenvolve.
Nia dehan, bainhira programa sira-ne’e implementa vizitante sei mai tantu lokál, nasionál no internasionál, nune’e infraestrutura sira tenke iha kondisaun, maibé agora iha ona aeroportu, portu, transporte aero inklui infraestrutura seluk sufisiente ona.
Kona-bá jestaun fronteiristika, Oé-Cussse nu’udar rai ketan ida hosi territóriu Timor-Leste no fronteira direitamente ho nasaun Indonézia tantu terrestre no marítima, tan ne’e presiza jestaun ida di’ak iha área fronteira sira.
Tuir nia, daudun ne’e fronteira iha Pante Makasar Sakato mak foin ativa, lakleur tán Oésilo, Pássabe no Nítibe bele mós reativa, bainhira iha ona konkordánsia entre Indonézia ho Timor-Leste.
“Kuandu Oé-Cusse komesa dezenvolve ona ho didi’ak turista ka ema vizita barakliu sei mai hosi viziñu sira, servisu fronteira tenki másimu iha kontrolu no seluktán,” nia dehan.
Notísia relevante:ZEEDOA hahú rekolla dadus hosi Pássabe prepara relatóriu Estadu Rejiaun
Iha biban ne’e, Cipriano da Cunha, nu’udar veteranu, fó hanoin, ba ekipa tékniku ZEEDOA, presiza mós envolve Nai Sengr de Morto iha elaborasaun Relatóriu Estadu Rejiaun, tanba iha mundu, só fatin tolu maka iha, Larantuka iha NTT Indonezia, Portugál no Timor-Leste iha Oé-Cusse ne’e.
“Ne’e tanba úniku iha mundu kada tinan ita selebra, entaun ita tenke halo polítika oinsa atrai vizitante mai Oé-Cusse, no konsidera mós turismu relijioza ida iha Timor-Leste,” nia katak.
Adelino Cau, hateten, bainhira ko’alia ba turizmu, ema mai hosi Dili no munisipíu seluk, konsidera hanesan turista, tanba mai Oé-Cusse, sei gasta osan ba povu Oé-Cusse.
Maibé pergunta mak ne’e, ema atu mai Oé-Cusse tanba saida, primeiru tenke iha buat ida importante maka nia bele hala’o vizita.
“Primeiru istória Oé-Cusse tenke prezerva didi’ak iha fatin ida, katak illa Timor fahe ba rua, Timor NTT no Timor-Leste, presiza buka hatene tanba saida maka fahe ba rua, relasaun saida Oé-Cusse rai enklave ida, nia istória ne’e tenki loloos para ema mai atu lee,” nia katak.
Notísia relevante:ZEEDOA fahe informasaun estudu tékniku ho pontu fokál kona-bá relatóriu Estadu Rejiaun
Entretantu, João Mendes Gonçalves, hetan nomeasaun hosi IX Governu Konstitusionál lideradu, Primeiru Ministru Kay Rala Xanana Gusmão, no simu ona pose nu’udar Koordenadór ZEESM, no dezigna Régio da Cruz Salu no Herculano de Sousa hanesan Vise-Koordenadór.
Jornalista: Abílio Elo Nini
Editór: Evaristo Soares Martins
