OÉ-CUSSE, 13 marsu 2024 (TATOLI) – Ekipa Zona Espesiál Ekonomia Dezenvolvimentu Oé-Cusse Ambeno (ZEEDOA), kuarta ne’e, disemina informasaun estudu tékniku ho pontu fokál sira kona-bá relatóriu Estadu Rejiaun ba futuru estabesimentu Zona Ekonómia Espesiál Sosiál Merkadu Timor-Leste (ZEESM-TL) iha Rejiaun Administrativa Espesiál Oé-Cusse Ambeno (RAEOA).
Notísia relevante: ZEEDOA hahú rekolla dadus hosi Pássabe prepara relatóriu Estadu Rejiaun
Diseminasaun ne’e dirije hosi Vise-Koordenadór Ezekutivu ZEEDOA, Regio da Cruz Salu, hamutuk ho pontu fokál sira mai hosi kada Sekretáriu Rejionál sira, Organizasaun Naun Governamentál (ONG) lokál, nasionál, internasionál, Ajénsia Internasionál UNDP no akadémiku sira.
“Ohin, enkontru hamutuk ho pontu fokál sira-ne’ebé envolve iha grupu servisu tékniku, komisaun ezekutiva ZEEDOA ninian, atu hahú elabora estudu sira, ba konseitasaun estratéjia programa prioridade ba investimentu ZEESM iha Oé-Cusse,” Regio da Cruz Salu, ko’alia iha abertura diseminasaun, hala’o iha otél Ambeno.
Nia informa, estudu hotu-hotu sei halo, liuhosi koordenasaun entre grupu traballu tékniku sira, ba relatóriu Estadu dezenvolvimentu RAEOA nian, atu hatene, poténsia saida maka halo tiha ona, saida mak lisaun instituisionál, saida maka bele aprende hosi pássadu to’o ohin loron kona-bá, inisiativa investimentu ne’ebé sei sai baze ba arankamentu ba investimentu ho eskala boot.
Nia fundamenta, servisu ida-ne’e, la fasil maibé ekipa tékniku sira, multi-disiplinária, inklui hosi RAEOA rasik, universidade sira, Governu sentrál, no profisionál Timor-oan hotu, ne’ebé iha méritu atubele ajuda dentru prosesu identifikasaun konseitasaun estratéjiku ba futuru estabelesimentu ZEESM.
“Ida-ne’e maka objetivu ohin nian, ami agradese tebes tanba membru Autoridade RAEOA nomea no fasilita kargu xefia hosi kada setór, nune’e bele partisipa ativamente iha levantamentu dadus ba estudu ne’e,” nia agradese.
Nia hateten, bainhira finaliza estudu tékniku, komisaun sei haree no analiza mak foin bele adota iha planu estratéjiku, kona-bá elaborasaun investimentu prioritizasaun.
“Iha ne’e ba área temátika tolu, sosiál, ekónomika produtiva, infraestrututra no área boa-governasaun no seluk-tán atu kompleta, hanesan panorama ida importante, atubele komprende saida mak ita tenke hatene, molok ita aranka ba iha prioridade ba iha investimentu ne’e rasik,” nia katak.
Notísia relevante: João Gonçalves sei submete relatóriu estabelesimentu ZEESM bá Konsellu Ministru
Regio da Cruz Salu, konfirma estudu levantamentu ba relatóriu Estadu Rejiaun, nu’udar fahe dahuluk, serteza sei fó ona idea kona-bá oinsa maka komisaun ne’e to’o ikus bele aprezenta nia, vizaun planu ba orsamentu futuru investimentu ne’e rasik.
“Komisaun ne’e rasik, iha prosesu ida atu prepara no submete nia estatutu orgániku nu’udar entidade institutu jurídiku ida, nune’e nia mós bele iha biban iha institusionál, bele hala’o nia servisu tuir planu no vizaun mandatu ne’ebé iha,” nia tenik.
Fatin hanesan, Sekretária Rejionál ba Asuntu Edukasaun, Inácia Tamele, reprezenta Autoridade RAEOA, apela atu fornese dadus ho loos no kredivel, nune’e bele sai nu’udar Planu Asaun Annuál (PAA) nian.
“Ho asesmentu (avaliasaun)) dadus mak ita foin bele hatene buat-ne’ebé halo ona maibé laiha sustentabilidade, ha’u husu atu fó dadus ho onestu no justu, nune’e atu sai relatóriu Estadu Rejiaun, atu hatuur ho di’ak, tanba depois halo levantamentu dadus, sei halo analiza atu halo ba relatóru Estadu Rejiaun, hosi relatóriu ne’e, sei sai evidénsia ida atu halo Planu Asaun Annuál tinan hirak tuir mai,” nia husu.
Notísia relevante:ZEESM no SERVE diskute atu estabelese balkaun úniku iha Oé-Cusse
Entretantu, rezolusaun Governu númeru 7/2024, loron 24, fulan-janeiru, kriasaun Komisaun Ezekutivu no estabelesimentu Zona Espesiál Ekonómia Dezenvolvimentu Oé-Cusse Ambeno (ZEEDOA).
Objetivu hosi Komisaun Ezekutiva ne’e, kria hanoin ida atu estabelese Zona Espesiál Ekonomia Dezenvolvimentu Oé-Cusse Ambeno (ZEEDOA). Ho ninia kna’ar durante fulan 12 atu prepara no aprezenta ba Governu estudu detallu ida ka Relatóriu Estadu Rejiaun RAEOA nian.
Nune’e mós prepara planu no orsamentu ba implementasaun Zona Espesiál Ekonomia ba Dezenvolvimentu iha Oé-Cusse Ambeno (ZEEDOA).
Jornalista: Abílio Elo Nini
Editór: Evaristo Soares Martins
