Presu nesesidade bázika iha merkadu Maliana normál
BOBONARO, 11 abril 2024 (TATOLI)-Ministériu Komérsiu no Indústria (MCI, sigla portugés) munísipiu Bobonaro, observa presu nesesidade bázika iha merkadu kapitál Maliana normál hela hanesan bainbain.
Diretór MCI Munisípiu Bobonaro, Henriquito Marques Leite, hateten presu hirak ne’e ekipa sira deteta normál hafoin halo inspesaun ba sasán nesesidade bázika, materiál konstrusaun no presu kombustível loron tolu durante fulan-abríl 2024.
Inspesaun ne’e bazea ba dekretu lei Númeru 29/2011 kona-ba presu justu no lei numeru 4/2011 krime no espekulasaun no lei númeru 8/2016 konabá protesaun jonsumidores.
Notísia relevante: MCI deteta empreza Xines ‘Yangfa’ tenta subar foos subsídiu
“Ita halo inspesaun ba presu sasán ne’ebé ita-nia empreza, vendedór sira fa’an hela iha Maliana, liga ho presu hirak ne’e normál, razaun tanba ita la’ós produtora, ita hein fa’an deit, sira ba sosa iha Dili mak mai fa’an bazea ba presu nasionál, ami halo inspesaun bazea ba sira-nia kuitansi, tanba tuir ita-nia regulamentu labele liu hosi 10%,” nia informa ba jornalista sira iha Maliana, kinta ne’e.
Responsavél MCI munisípiu Bobonaro ne’e fundamenta, inspesaun ne’e realiza kada fulan inklui mos ba presu kombustível no materiál konstrusaun.
“Sasán sira-ne’e presu normál hotu, razaun tanba sira fa’an la sees hosi 10% tuir regulamentu, sira faan iha ne’ebá ho folin hanesan, sira iha-ne’e mós faan natoon hela,” nia informa.
Henriquito reforsa atividade ne’e provizóriu sei konsentra iha kapitál Maliana no seidauk abranje to o postu administrativu sira tanba kestaun tékniku no menus rekursu umanu.
MCI prontu simu keixa hosi komunidade no líder komunitária sira bainhira identifika iha kompañia no negosiante sira fa’an sasán ho folin liu fali regulamantu normál 10%.
“Ami prontu halo intervensaun ba kedas iha fatin akontesimentu, husu ba konsumidór sira hato’o keixa nune’e emprezáriu no vendedór sira labele halo manipulasaun ba sasán nia folin,” nia hateten.
Tuir dadus ne’ebé ekipa sira rekolla iha merkadu Maliana presu nesesidade bazika kompostu hosi Fos ho tipu Glos kilograma 30 ho nia presu inísiu $17 atuál $20, kolograma 25 presu inísiu $15 atuál $18,50, kilograma 20 saka ida presu inísiu $13 atuál $16,50.
Foos marka manu victoria kilograma 25 presu inísiu $15 atuál $18, kilograma 20 presu inísiu $12 atuál $15,50, foos gosto los kilograma 25 presu inísiu $15 atuál $18,50, kilograma 20 folin inísiu $12 atuál $15,50, foos marka folsom kilograma 20 ho folin $16, foos marka beruang merah kilograma 20 ho folin $14,50, foos tuna kilograma 25 ho folin $18:00, foos columbia kilograma 20 ho folin $15,50.
Foos ho marka beras wangi kilograma 20 ho folin $19.50, marka radjawali kilograma 20 ho folin $14, mangkok merah kilograma 15 ho folin $15.00, foos marka ikan mas kilograma 25 ho folin $17.50.
Nunee mós presu mina goreng bimoli litru 5 ho folin $6,50, litru 2 ho folin $3,50, mina goreng kunci mas litru 5 ho folin $6.50, litru 2 ho folin $3.50, marka mina bintang litru 5 ho folin $6.00, litru 2 ho folin $3.50.
Folin masi-nidar saka ida ka kilograma 50 ho folin $48.00, kilograma 5 ho folin $5,50 no kilograma 1 ho folin $1.00, trigu tali biru kilograma 25 ho folin $19.00, kilograma 20 ho folin $16.50, trigu, manu-tolun rak 1 ho folin 5.00 no kaixa 1 ho folin $55.00, ikan lata folin entre $0.50 to’o $1.50.
Naan nanu suam potong grama 800 ho folin $2,75, grama 900 ho folin $3.00, kilograma 1,100 ho folin $3.50 no supermi mie sedap ho folin $7,50.
Notísia relevante: Folin foos sa’e iha merkadu Bobonaro
Jornalista: Sérgio da Cruz
Editór: Evaristo Soares Martins
