SEDL husu PAM Viqueque foku ba implementasaun projetu PDIM 2024
VIQUEQUE, 11 abríl 2024 (TATOLI)— Sekretáriu Estadu Dezenvolvimentu Lokál (SEDL),Mateus dos Santos Tallo, kinta ne’e, hala’o enkontru dahuluk ho Prezidente Autoridade Munisípiu Viqueque ho Diretór Munisipál sira atu tau atensaun ba asuntu ezekusaun Orsamentu Jerál Estadu (OJE) 2024 liuliu prepara planu no implementa projetu Programa Dezenvovlimentu Integradu Munisipál (PDIM).
PAM Viqueque ho Diretór Servisu Munisipál sira simu pose hosi Governu liuhosi Ministériu Administrasaun Estatál (MAE) iha loron 26-Marsu.
“Nune’e, ha’u halo enkontru dahuluk ho sira hodi fó hanoin atu atensaun liuliu ba ezekusaun OJE 2024 nian ne’ebé maka atu implementa iha munisípiu Viqueque liuliu ba programa Dezenvolvimentu Integradu Munisipál (PDIM) nian”, Mateus dos Santos Tallo, hateten ba Agência TATOLI, iha resintu administrasaun Viqueque, ohin.
Governante ne’e afirma ba azekusaun OJE 2024 mak PAM ho ninia estrutura preparasaun projetu foun ba Programa Dezenvolvimentu Integradu Munisipál (PDIM) ne’ebé sei implementa iha tinan 2024.
Projetu PDIM 2024 infarestutura munisípiu Viqueque ne’ebé tau ona prioridade hamutuk haat maka loke estrada foun ho kilometru ida ba fatin lixu, Konstrusaun foun ba Ensinu Báziku Filiál (EBF) Uaimori, Konstrusaun Edifísiu no moru ba SEFOPE no konstrusaun edifísiu foun ba Ensinu Báziku Sentrál (EBC-sigla portugés) ho saladeaula neen.
Iha fatin hanesan Prezidente Autoridade Munisípiu (PAM) Viqueque, Francisco Cruz Simõs de Gonzaga Soares, hateten, oritasaun ne’ebé SEDL fó ba autoridade munisípiu Viqueque atu aseleira servisu kona-ba PDIM nian
“Ami simu ona orientasaun husi Sekretáriu Estadu atu tau matan ba implementasaun projetu liuliu PDIM ho baze ba programa haat ne’ebé maka ami define ona iha munisípiu Viqueque ”. nia afirma.
Ezekusaun OJE 2024 atinje 5%
Entertantu, PAM Viqueque, mós relata iha trimestrál dahuluk hahú hosi Janeiru to’o Marsu, ezekusaun orasamentu Jerál Estadu (OJE) 2024 atinje 5%, maioria ezekusaun iha kategoria saláriu no vensimentu de’it.
“Foin atinje 5% ho razaun tanba ami foin hetan pose iha loron 26 Marsu. Nune’e ezekusaun 5% ne’e maioria iha kategoria Saláriu no Vesimentu. Ezekusaun iha kategoria seluk seidauk la’o”, katak PAM ne’e.
OJE 2024 aloka ba munisípiu Viqueque hamutuk $6.701.423,00 ne’ebé fahe ba kategória saláriu no vesimentu $2,012,655.00, ne’ebé gasta atuál $312.051,55, obligasaun laiha, komitementu laiha, pursentu 15,50%, saldo altuál $1.700.603,45. Hosi orsamentu ne’e ezekuta ba funisionáriu no kazuál sira.
Iha kategória Bens no Servisu hamutuk $701.205.00, ne’ebé gastu atuál $4.611,00, obligasaun laiha, komitementu laiha no saldu atuál $696,594.00. Nune’e ezekusaun ekivalente ho 1% tanba foku ba viajen lokál, formasaun no diskursu.
Orsamentu ba kategória transferénsia públiku ho alokasaun $2.470.737.00, daudaun seidauk halo gastu no kategória kapitál menor mós seidauk ezekuta nune’e nafatin ho $149, 500.00. Enkuantu, orsamentu ba kapitál dezenvolvimentu alokadu $1.367.326,00, mós seidauk ezekuta.
Notísia relevante:PDIM Viqueque laiha pesoál enjeñeiru hodi kontrola kualidade projetu
Jornalista : Vitorino Lopes da Costa
Editór : Florêncio Miranda Ximenes
