DILI, 11 abríl 2024 (TATOLI)-–Sekretaria Estadu Kooperativa (SEKoop) no Banku Sentrál Timor-Leste (BCTL, sigla portugés), kinta ne’e, renova hikas akordu ne’ebé antes ne’e selebra ona iha área inkluzaun finanseira.
Sekretáriu Estadu Kooperativa, Arsénio Pereira da Silva, hateten, akordu ne’e hanesan kontinuasaun tanba Governu anteriór halo revizaun uitoan bazeia ba programa Governu nian. Akordu ne’e importante tebes tanba sei apoia grupu kooperativa sira liuhusi formasaun kona-ba inkluzaun finanseira.
“Liuhusi akordu ne’e, SEKoop serbisu hamutuk ho Banku Sentrál hodi fó formasaun ba grupu kooperativa, movimentu kooperativa, liu-liu Kooperativa Kréditu Uniaun hodi sira bele dezenvolve di’ak liután sira-nia atividade ekonómika,” Sekretáriu Estadu hateten iha ámbitu serimónia asinatura akordu, iha edifísiu SEKoop, Akait, kinta ne’e.
Kooperativa rejistadu hamutuk 219, ne’ebé sira sai hanesan benefisiáriu, nune’e mós populasaun ein jerál tantu direta no indireta sai alvu ba implementasaun programa.
Notísia relevante : SEKoop no parseiru dezenvolvimentu armoniza kooperasaun apoia grupu kooperativa
Iha biban hanesan, Governadór BCTL, Helder Lopes, reforsa katak akordu ne’e ninia durasaun to’o mandatu IX Governu Konstitusionál ramata.
“Objetivu husi asina akordu ne’e mak oinsá atu promove inkluzaun finanseira, katak servisu finanseira nian ne’e to’o ba ema hotu, liu-liu ema sira iha área rurál. Liuhusi akordu ne’e, SEKoop ho Banku Sentrál serbisu hamutuk para promove investimentu ba empreza mikro, ki’ik no médiu-sira ne’ebé fasilita husi atividade kooperativa, liu-liu atividade negósiu ne’ebé halo liuhusi membru kooperativa sira iha territóriu,” Governadór akresenta.
Objetivu seluk maka liuhusi akordu ne’e SEKoop ho Banku Sentrál serbisu hamutuk hodi apoia kooperativa sira iha territóriu atu promove nível konsumu tantu individuu ka membru kooperativa ne’e rasik nomós sira-nia família.
“Banku Sentrál iha objetivu tolu, ne’ebé importante tebes tanba liuhusi kooperasaun ida-ne’e ami sei hamutuk ho SEKoop atu implementa buat rua dahuluk nian mak fó formasaun finanseira ka literasia finanseira ba membru kooperativa ne’ebé identifika no organiza ona husi SEKoop liu-liu kooperativa ne’ebé mai ho nia natureza Kréditu Uniaun, daruak nian maka liuhusi kooperasaun ida-ne’e ami serbisu hamutuk atu halo supervizaun, monitorizasaun no akompañamentu ba atividade kooperativa Kréditu Uniaun,” Helder tenik.
SEKoop rejista federasaun hamutuk haat hanesan Federasaun Hanai Malu, Federasaun Peska, Federasaun Multi Setorál Tokodede, no Federasaun Agríkola no kooperativa hamutuk 219.
Jornalista : Antónia Gusmão
Editora : Julia Chatarina
