“Parteira sira iha responsabilidade atu redús mortalidade infantil iha TL”
DILI, 12 abril 2024 (TATOLI)–Reprezentante Interinu Fundu Nasaun Unida ba Populasaun (UNFPA, sigla inglés), Bruce Campbell, hateten profisionál saúde hanesan parteira iha papel importante iha sosiedade.
Notísia Relevante: Governu la fó atensaun ba parteira sira serbisu iha área rurál
Parteira sira ema-ne’ebé fó kuidadu ba inan sira isin-rua, bebe moris no depoizde bebe moris maibé sira-nia abilidade la’os fó partus de’it maibé parteira sira-ne’ebé bem treinada, ne´ebé iha responsabilidade atu redus mortalidade infantile iha Timort-Leste.
“Ida-ne’e nia halo papél importante tebe-tebes atu promove saúde iha komunidade nia le’et. Ita hotu-hotu iha responsabilidade atu iha maternidade seguru ba atendimentu ba inan sira isin-rua, partus no bebé sira moris. Parteira iha responsabilidade atu redús mortalidade infantil iha nasaun ne’e, tanba tuir dadus sensu 2016 nian, taxa mortalidade sei aas,” nia hateten liuhusi semináriu nasionál ne´ebé hala´o hosi APTL no Asiasasaun Mediku Timor-Leste (AMTL) ho tema “Padraun Profisaun Parteira Timor-Leste”, iha Hotel Timor, sesta ne´e.
Nia esplika, UNFPA iha papel importante iha asuntu haat tuir mai mak hakarak fó formasaun ba parteira sira bazeia ba iha kompeténsia, dezenvolve mekanizmu regulamentu ida atu asegura servisu parteira nian, foti parteira sira-nia lian ba sosiedade no halo advokasia no polítika atu bele halo investimentu no asegura ba parteira sira-nia serbisu.
Atu redus taxa mortalidade ba inan no bebé iha Timor-Leste, ema hotu presiza serbisu hamutuk hodi asegura serbisu maternidade.
Médiku husi Ospitál Referál Baucau, Agostinho dos Santos, husu ba parteira sira atu bele serbisu hamutuk hodi bele fó asisténsia ba atendimentu saúde ba inan no oan.
“Médiku no parteira tenke sai parseiru di’ak. Médiku no parteira labele halo servisu mesak. Médiku no parteira tenke servisu hamtuk hodi bele fó asistensia saúde ida di’ak-liu inan no oan, hodi nune’e ita bele hahú redús taxa mortalidade liuliu ba inan no oan sira,” médiku Agostinho dos Santos, hateten iha semináriu nasionál ne´e.
Nia sujere, médiku no parteira tenke servisu iha ekipa hodi bele halo atendimentu ba inan no oan no komunidade atu hasa’e kualidade moris.
Jornalista : Jesuína Xavier
Editór : Cancio Ximenes
