BOBONARO,15 abríl 2024 (TATOLI)-Sentru Juventude Munisípiu Bobonaro (CJMB sigla Portugues), segunda ne’e, oferese ona formasaun ba foinsa’e sira iha postu administrativu Maliana kona-ba relasaun saudavél liu-liu kona-ba saúde reprodutiva nune’e bele prevene aan hosi seksu livre, moras hada’et no kaben sedu.
Diretór ezekutivu CJMB, Alcino Barreto hateten formasaun ne’e, sei hala’o durante loron 5 hodi hasa’e koñesimentu foinsa’e sira-nian iha saúde reprodutivu liuliu oinsá atu prevene aan husi moras hada’et sira hanesan HIV/SIDA.
“Ida ne’e risku bo’ot mai ita, entaun realiza formasaun ba ita bo’ot sira tanba ita-bo’ot sira mak determinante ba futuru nasaun nia, se joven sira mak kona tan moras hanesan ne’e, ita imazina took nasaun nia vida ita atu lori ba ne’ebé, tanba ne’e, liu hosi formasaun ne’e imi bele iha konesimentu no partila tutan ba família,viziñu no kolega sira atu bele prevene aan,” nia hateten iha Sentru Juventude Maliana, segunda ne’e.
Notísia Relevante:Padre Ernesto husu sarani sira iha Bobonaro luta hakotu korrente HIV/AIDS
Iha fatin hanesan Diretór Nasionál Dezenvolvimentu Juventude, Ministeriu Juventude Desportu Arte no Kultura, Firminio dias Quintas, hateten,governu implementa programa formasaun ba foinsa’e ne’e ho objetivu atu prevene joven sira hosi moras HIV/SIDA tanba hosi rezultadu peskiza iha munisípiu Aileu, Dili no Covalima katak foinsa’e hosi tinan 18 to’o 24 pursentu 25% mak sofre moras HIV/SIDA kauza hosi ransu livre.
Nune’e mós Diretór Servisu Munisipál Saúde, munisípiu Bobonaro, Paulina de Asunção Deneire, dehan, formasaun saúde reprodutivu ba foinsa’e ne’e importante nune’e bele prevene joven sira hosi ransu livre.
Tanba tuir dadus husi servisu saúde munisipál Bobonaro oras ne’e rejista ona kazu HIV/SIDA hamutuk 113, maibé hosi númeru ne’e pasiente 43 maka hala’o hela tratamentu rutina no restu ne’e lakoi kontribui ho servisu saúde munisipál hodi halo tratamentu saúde.
“Ami to’o agora lahatene sira-nia paradeiru, sira fahe hela moras ne’e iha hela komunidade tanba ne’e mai ita hotu hamutuk liu-liu joventude sira,imi ne’e mak aban bainrua sei troka na’i-ulun sira entaun se imi-nia kondisaun la saudavél, imunidade fraku oinsá imi atu dezenvolve ita-nia nasaun,” Paulina hateten.
Entertantu, foin lalais ne’e, gvernu liuhosi Ministeriu Juventude Desportu Arte no Kultura, estabelese ona akordu ho Ajénsia Internasionál UNFPA hodi apoia formasaun ba foinsa’e sira iha suku hotu-hotu iha territóriu Timor-Leste kona-ba relasaun saudavél no saúde reprodutivu nune’e bele hadook aan husi moras hada’et HIV/SIDA no problema kaben sedu.
Programa ne’e, implementa ona faze dahuluk nian iha Rejiaun Espesiál Oé-Cuse Ambeno (RAEOA) no faze daruak sei implementa ba munisípiu lima no sei abranze bá iha suku hotu-hotu sira iha territóriu Timor-Leste.
Notísia Relevante:MS husu ema hotu luta kontra moras hada’et iha TL
Jornalista: Sergio da Cruz
Editór : Agapito dos Santos
