Ekipa MS hahú prepara esbosu lei ‘Bom Samaritano’
DILI, 15 abríl 2014 (TATOLI) – Médiku Departamentu Emerjénsia iha Ospital Nasionál Guido Valadares, Todi de Jesus, hateten, ekipa Ministériu Saúde (MS) hahú prepara ba elaborasaun esbosu ‘Lei Bom Samaritano’, ne’eduni komesa ona analiza lei ne’e hodi bele elabora esbosu ida.
“Preparasaun ba Lei Bom Samaritano iha faze inísiu, ita prepara de’it nia draft atu aprezenta ba Konsellu Konsultivu Ministériu Saúde nune’e mós ami hakarak ideia husi ekipa peritu, ekipa legais sira no ita haree mós esperiénsia nasaun sira seluk kona-ba implementasaun Lei ne’e”, mediku iha HNGV, Todi de Jesus, ba Tatoli, iha HNGV, iha Bidau.
Tuir médiku ne’e, Lei Bom Samaritano husi nasaun sira seluk hanesan Austrália ho Filipina ne’e simples, maibé iha nia implementasaun ne’e mak ema hotu tenke hatene.
Iha lei husi nasaun sira ne’e permite ema halo asaun ‘Bom Samaritano’ ba iha eventu bo’ot sira hodi ema bele ajuda ema seluk.
Nia esplika, depoizde kriasaun esbosu Lei Bom Samaritano, ekipa sei halo semináriu ida kona-ba konsultasaun ba lei ne’e rasik.
“Ida-ne’e ita presiza Autoridade Protesaun Sívil iha Ministériu Interiór no sira seluk. Foufoun ita iha aldeia atu kria Dekretu-lei ka Diploma, mas iha introdusaun semináriu, ita tau ideia atu kria Lei Bom Samaritano atu implementa iha Timor,” nia hateten.
Todi de Jesus dehan, Lei Bom Samaritano ne’e mós sei aprezenta mós ba iha Konsellu-ministru no Parlamentu Nasionál hodi bele hetan aprovasaun.
Nia, reforsa kriasaun Lei Bom Samaritano ne’e nia objetivu mak atu ema bele ajuda ema seluk, tanba iha ikusikus ne’e ema monu derrepente iha fatin públiku sira hanesan Aeroportu no Timor Plaza.
“Ita hakarak ne’e asaun ema ne’ebé fó primeiru sokorru ba ema moras ka dezastre ne’e labele hetan ema prejudika nia mak halo mate iha loron ikus. Tan ne’e, Lei Bom Samaritano hanorin ema di’ak, ajuda ema seluk”, nia dehan.
Notísia relevante:Governu presiza kria lei ‘Bom Samaritano’
Jornalista: Jesuína Xavier
Editór: Rafael Ximenes de A. Belo
