OÉ-CUSSE 15 Abríl 2024 (TATOLI) – Servisu Saúde Rejiaun Administrativa Espesiál Oé-Cusse Ambeno (RAEOA) rejista kazu asu tata ema sa’e iha sub-rejiaun Oésilo, Pássabe, Nítibe no Pante Makasar sa’e ona ba 77.
“Kazu 77 ne’e hasai ona amostra 13, na’in-rua seidauk iha rezultadu, na’in-10 iha rezultadu negativu, no na’in-ida pozitivu no mate ona tanba kazu ne’e. Asu tata iha dezembru 2023, mosu mai ho sintoma kompletu, depois ita transfere bá ospitál nasionál, ikus mai mate foin lalais ne’e”, Sekretáriu Rejionál ba Asuntu Saúde, Luís de Jesus Neno, ko’alia iha otél Ambeno, segunda ne’e
Notísia relevante: Timoroan ida mate ho virus Rabies iha HNGV
Tuir nia, asu sira-ne’ebé durante ne’e tata hamutuk 16, hosi númeru ne’e 10 pozitivu raiva hafoin halo teste ba amostra iha laboratóriu no daudaun ne’e asu sira-ne’e mate ona, hela asu neen maka seidauk halo teste iha labotóriu, maibé simu ona vasina hosi ekipa veterinária hodi haree nia kondisaun.
“Asu laiha problema, tanba nia tata tiha mate rasik, aibé virus ne’ebé iha asu ne’e da’et ona ba ema-ne’ebé hetan tata. Ne’e maka ita tenke haree fulan ida ka rua bele mosu sintoma. Tanba ne’e, kuandu ema ruma hetan tata, lori kedas bá fasilidade saúde atu hetan tratamentu espesiál”, nia apela.
Iha fatin hanesan, Sekretária Rejionál Agrikultura, Filomena Sila, informa katak Servisu Agrikultura, liuhosi Departamentu Pekuária halo ona asaun liuhosi vasinasaun ba animál sira iha sub-rejiaun haat. Aliénde ne’e mós kontinua koopera ho servisu saúde, liuliu ba atividade prevensaun no sensibilizasaun ba komunidade iha nivél suku no aldeia.
Notísia relevante: Kuarentena bandu populasaun Oé-Cusse lori sai animál bá munisípiu seluk
Dirijente Agrikultura RAEOA ne’e fó sai katak iha sub-rejiaun Pante Makasar vasina ona asu sira iha suku lima mak hanesan Costa, Naimeko, Nípani, Lifau no Lalisuk, no falta suku Cunha, Taiboko no Bobokase.
Iha sub-rejiaun Oésilo, vasina ona animál iha suku rua mak Usitaqueno no Bonbometo, hela suku Uasitasa’e. Iha sub-rejiaun Pássabe realiza ona vasina iha suku Abani ho Malelat, iha sub-rejiaun Nítibe kompleta ona vasina ba suku lima mak hanesan Ban-Afi, Bene-Ufe, Usitaku Suni-Ufe no Lela-Ufe.
“Ne’ebé suku 18 ne’e ita kompleta iha fulan-Abríl ne’e, tanba ekipa kontinua la’o iha baze no aviza mós ba komunidade sira atu kesi asu sira iha uma, nune’e fasil bele simu vasina”, nia konklui.
Tuir dadus husi Ministériu Agrikultura, Pekuária, Peska no Floresta, totál asu rejistadu iha munisípiu tolu no RAEOA hamutuk 49.963, kompostu husi Oé-Cusse iha 10.189, Covalima 7.104, Bobonaro 12.755 no Dili 19.915. Husi totál ne’e, dezde janeiru ekipa halo ona vasina ba asu iha Oé-Cusse hamutuk 7.334, Covalima 4424, Bobonaro 5659 no Dili 10.856.
Notísia relevante: Kazu asu tata ema iha Oé-Cusse sa’e ba 40
Jornalista: Abílio Elo Nini
Editora: Maria Auxiliadora
