SERVE submete ona lista rekrutamentu interna pesoál na’in-230 ba MKAE

DILI, 15 abríl 2024 (TATOLI)–Servisu Rejistu no Verifikasaun Emprezariál, Institutu Públiku (SERVE, I.P) submete ona lista rekrutamentu interna pesoál na’in-230 ba Vise Primeiru-Ministru, Ministru Koordenadór Asuntu Ekonómiku (MKAE) no Ministru Turizmu no Ambiente, Francisco Kalbuadi Lay.

Diretór Ezekutivu SERVE, I.P, Florêncio Sanches, informa, Ministru Francisco Kalbuadi Lay, iha loron 19 fevereiru 2024, bolu ona dirijente husi instituisaun Estadu sira ne’ebé tutela hodi enkontru.

“Rezultadu enkontru di’ak tebes tanba nia fó fila ba jerente másimu instituisaun sira hodi halo fali avaliasaun tuir lei Funsaun Públika. Ministru asina karta ida iha loron 20 fevereiru, maibé karta ne’e rasik ami simu iha loron 17 marsu. Kontíudu karta ne’e katak bele halo prosesu rekrutamentu tuir nafatin padraun Komisaun Funsaun Publika nian, maibé másima na’in-10. Rekrutamentu ne’e halo interna, ne’ebé finaliza ona no submete hotu ona ba Ministériu Koordenadór Asuntu Ekonómiku,” Florêncio Sanches, informa ba Agência Tatoli, via telefónika, segunda ne’e.

Notísia relevante : Funsionáriu 166 husu Diretór SERVE,I.P avalia dezempeñu servisu

Tuir Dirijente, rekrutamentu bele halo atu priense fatin mamuk sira maibé iha kada diresaun labele liu ema na’in-10, enkuantu sede iha munisípiu ema na’in-14.

“Karta ne’e hateten mós katak lori lista ba aprova tiha mak bele asina kontratu. Ne’ebé ha’u kumpre tiha ona hodi submete lista ba, ne’ebé Vise Primeiru-Ministru utiliza nia kompeténsia tomak hodi foti desizaun,” nia tenik.

SERVE iha diresaun hanesan Diresaun Atendimentu Públiku, Administrasaun, Finansa, Aprovizionamentu, no Jurídiku.

Enkuantu, totál lista ne’ebé submete ba Ministru Koordenadór Asuntu Ekonómiku hamutuk 230.

“Espera karta ne’ebé haruka bá bele konsidera. Ne’ebé espera molok Ministru Koordenadór foti desizaun bele bolu ami ba tuur hamutuk fali hodi haree progresu ba oin. Razaun rekrutamentu interna tanba funsionáriu kontratu sira antes hapara ne’e iha ona esperiénsia serbisu no serbisu kleur ona, ne’ebé kontinua ho ida-ne’e,” Diretór akresenta.

Instituisaun  ne’ebé tutela  iha MKAE mak hanesan  Autoridade  Inspesaun  no Fiskalizasaun Atividade Ekonómika Sanitária no Alimentár (AIFAESA), SERVE, I.P, Institutu Nasionál Dezenvolvimentu de Mão-de-Obra (INDMO), Institutu Apoiu Dezenvolvimentu Emprezariál (IADE), Institutu Kualidade Timor Leste (IQTL), Autoridade Turizmu Timor-Leste (ATTL), Sentru Nasionál Formasaun Profisionál no Empregu Timor-Leste (CNFPE), Sentru Nasionál Formasaun Profisionál – Bekora (CNFP-Bekora), Inspesaun-Jerál Traballu (IGT), Sentru Konvensaun Dili (CCD), Institutu Peskiza, Dezenvolvimentu, Formasaun no Promosaun Bambu (Institutu Bambu).

Nune’e mós, Komisaun Nasionál ba Fasilitasaun Komérsiu (CONFAC, sigla portugés), Ajénsia Promosaun ba Investimentu no Esportasaun Timor-Leste, I.P. (TradeInvest Timor-Leste, I.P), GESPIN – Jestaun Parke Industriál, S.A., Sentru Lojístiku Nasionál (CLN, sigla portugés), Sentru Turizmu no Informasaun Turístika, Sentru Restaurasaun/Food Courts, Pouzada, Autoridade Nasionál Lisensiamentu Ambientál, Institutu Públiku (ANLA, I.P), no Autoridade Nasionál Dezignada ba Kombate Alterasaun Klimátika, Institutu Públiku (ANDKAK, I.P). 

Jornalista     : Antónia Gusmão

Editora          : Julia Chatarina