AILEU, 17 Abril 2024 (TATOLI)-Prezidente Interina Autoridade Munisípiu Aileu, Vitória Mesquita do Rêgo, hateten atu implementa polítika dezentralizasaun iha munisípiu Aileu, rekezitu ida maka tenke aumenta rekursu umanu ne’ebé sufisiente nune’e bele suporta iha faze instalasaun institusionál no prosesu preparasaun admininistrativa molok simu responsabilidade másimu husi Governu sentrál.
Prezidente interina ne’e informa katak, hafoin simu pose iha janeiru tinan ne’e, no fulan iha fevereiru 2024, ekipa tékniku hosi liña ministriál halo ona avaliasaun ba kondisaun mínimu munisípiu Aileu nian liu-liu kona-ba rekursu umanu, bens imóveis, infraestrutura bázika no kapasidade ezekusaun orsamentu Estadu hodi prepara ba implementasaun dezentralizasaun iha futuru.
Notísia Relevante :Polítika desentralizasaun administrativa apoia dezenvolvimentu setór privadu iha área rurál
“Husi rezultado avaliasaun ne’e aprezenta rekezitu mínimu ne’ebe munisípiu Aileu presija priense hodi simu dezentralizasaun ne’e, primeiru mak rekursu umanu hodi priense estrutura tanba atualmente munispiu ne’e iha de’it funsionáriu públiku 182, nune’e seidauk sufisiente atu destaka ba diresaun 19 ho nia departamentu hamutuk 40,” nia relata ba TATOLI durante programa live streaming iha salaun Prezidente Autoridade Munisípiu Aileu, kuarta ne,e.
Nia dehan ho sitausaun atuál ne’ebe munisípiu ne’e enfrenta, maka tuir lei katak kompozisaun servisu kada diresaun ida mínimu iha funsionáriu 20 no iha departamentu ida mínimu iha funsionáriu 10 atu bele akomoda servisu hotu-hotu tuir deskrisaun servisu ida-idak nian.
“Haree ba kompozisaun ida ne’e Autoridade Munisípiu Aileu nia rekursu umanu seidauk sufisiente hodi akomoda servisu sira ne’e hotu tanba ne’e, ita iha ona planu hodi halo rekrutamentu, gradualmente ba funsionáriu públiku hamutuk 600 hodi reforsa servisu administrasaun munisipál,? Nia hateten.
Ho situasaun ne’e, Vitória Mesquita hateten sei hatoo proposta ba Ministériu Administrasaun Estatal no Komisaun Funsaun Públika atu inisia ona prosesu rekrutamentu ba funsionáriu foun, fazeadamente tuir kondisaun orsamentu jerál Estadu ne’ebé aprova ba munisípiu iha tinan oin.
Notísia Relevante :Polítika Desentralizasaun Bele Kore Povu Hosi Ki’ak
Jornalista : Afonso do Rosário
Editór : Agapito dos Santos
