DILI, 17 abríl 2024 (TATOLI)—Governu liuhusi reuniaun ordinária Konsellu Ministru (KM), kuarta ne’e, aprova projetu dekretu-lei ba alterasaun dahuluk husi dekretu-lei númeru 13/2016, loron 18 maiu kona-ba Regulamenta Fundu Infraestrutura, ne’ebé aprezenta husi Ministru Planeamentu no Investimentu Estratéjiku, Gastão Francisco de Sousa.
“Inisiativa ne’e ho intensaun atu kontinua kumpre di’ak liután regra governasaun di’ak, transparénsia no responsabilizasaun iha aktu sira ne’ebé atinje objetivu fundu nian, dekretu-lei ida-ne’e hakarak atu estabelese medida adisionál hodi hadi’a efisiénsia administrativa Sekretariadu Grande Projetu nian hanesan órgaun apoiu tékniku no administrativu Konsellu Administrasaun,” Vise-Ministu Asuntu Parlamentár, Adérito Hugo da Costa, relata hafoin reuniaun ezekutivu, iha Palásiu Governu.
Notísia relevante : PN aprova orsamentu ba Fundu Infraestrutura
Antes ne’e, Fundu ne’e halo operasaun hanesan fundu autónomu durante dékada ida, hafoin revizaun ne’ebé hala’o iha tinan 2016, hodi hala’o revizaun pontuál ida ba diploma ne’ebé regulamenta nianune’e bele aliña ho objetivu ne’ebé hatuur ona iha programa IX Governu Konstitusionál.
“Diploma ne’e mós klarifika katak projetu sira ne’ebé iha relasaun ho edifísiu, embaixada no servisu konsulár Timor-Leste nian iha rai-li’ur mós elejível hodi hetan finansiamentu husi Fundu Infraestrutura,” governante ne’e akresenta.
Jornalista : Antónia Gusmão
Editora : Julia Chatarina
