DILI, 17 abríl 2024 (TATOLI)—Ekipa konjunta ne’ebé lidera husi Sekretaria Estadu Asuntu Toponímia Organizasaun Urbana (SEATOU), kuarta ne’e, kontinua sobu uma no barraka hamutuk 20-resin, ne’ebé okupa espasu públiku, iha área Aitarak-laran.
Ekipa ne’e kompostu husi SEATOU, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), Ministériu Obra Públika (MOP), Terra no Propriedade, Jestaun Merkadu munisípiu Dili no entidade relevante seluk.
“Ohin ita mai Aitarak-laran nian sobu komunidade ne’ebé okupa espasu públiku, entaun ita loke atu ema asesu estrada ne’e husi leten to’o ba kraik, serbisu ita hala’o bazeia ba oráriu ne’ebé iha. Maluk sira ne’ebé ohin ita hasai ne’e enkontru ita hala’o tiha ona iha semana hirak kotuk ba no maluk sira prontu koopera, ohin ita mai hasai,” Sekretáriu Estadu Asuntu Toponímia Organizasaun Urbana, Germano Santa Brites Dias, hateten iha Aitarak-laran.
Ekipa konjunta ezekuta serbisu bazeia ba dekretu-lei númeru 3/2024 17 janeiru, alterasaun dahuluk dekretu-lei númeru 33/2008 27 agostu, kona-ba ijiene no orden públiku. Nune’e mós, iha dekretu-lei númeru 51/2016 28 dezembru kona-ba lisensiamentu mesajen publisitária, no dekretu-lei númeru 2/2017 22 marsu kona-ba sistema jestaun reziduu sólidu urbanu, inklui dekretu-lei númeru 3/2017 22 marsu kona-ba rejime zona estasionamentu durasaun limitada.
Notísia relevante : SEATOU hakarak transforma sidade iha territóriu sai moos no organizadu
Sekretáriu Estadu nafatin husu ba komunidade hotu hodi koopera nafatin ho Governu, nune’e bainhira simu ona notifikasaun, karik balun la konkorda no hakarak lori ba Ministériu Públiku, IX Governu prontu hodi hatan.
Governu la fó indemnizasaun ba komunidade ne’ebé ohin nia uma hetan sobu.
“Ekipa ne’ebé ha’u lidera laiha osan atu selu, tanba ami-nia mak bainhira haree ladi’ak tun hadi’a no sobu atu Ministériu Obra Públika bele halo dezenvolvimentu, tanba sidade ne’e ita nian hotu,” nia akresenta.
Sekretáriu Estadu Germano Santa Brites klarifika, atividade ne’ebé ekipa konjunta hala’o ho objetivu atu organiza sidade Dili no hanesan programa Governu nian, la’ós tanba vizita Amu Papa.
“Ha’u husu nafatin ba komunidade ne’ebé okupa rai iha área Aitarak-laran no antes ne’e simu ona indemnizasaun husi Governu anteriór, munisípiu Dili iha dadus kompletu nune’e di’ak liu muda sasán sai antes nune’e ekipa mai serbisu karik tuir nia dalan,” nia tenik.
Governante ne’e husu atu entidade hotu bele koopera no labele fa’an tan sasán iha fatin ne’ebé ekipa konjunta sobu ona antes ne’e tanba okupa espasu públiku.
Jornalista : Arminda Fonseca
Editora : Julia Chatarina
