DILI, 17 abríl 2024 (TATOLI)–Governu kria ekipa konjunta halo asaun kontrolu no fiskalizasaun ho objetivu atu kombate kontrabandu no falsifikasaun produtu tabaku.
Nune’e, liuhosi reuniaun Konsellu Ministru, delibera hodi fó orden ba Ministru Koordenadór Asuntu Ekonómiku, Francisco Kalbuadi Lay no Ministru Interiór, Francisco da Costa Guterres atu estabelese ekipa konjunta ne’e.
“Medida ida-ne’e konsidera iha importánsia atu garante seguransa no kualidade produtu, tantu alimentár no la’ós alimentár, nune’e mós ho objetivu atu kombate kontrabandu no falsifikasaun ba produtu tabaku,” Vise-Ministru Asuntu Parlamentár, Adérito Hugo da Costa, hateten hafoin reuniaun ezekutivu, iha Palásiu Governu, kuarta ne’e.
Notísia relevante : Timoroan gasta rendimentu 30% sosa tabaku
Objetivu prinsipál husi inisiativa ne’e maka atu asegura protesaun saúde públika no garante iha kumprimentu ba norma legál no regulamentár sira ne’ebé bele aplika no garante pagamentu impostu no taxa ne’ebé tenke selu husi ajente ekonómiku sira.
Jornalista : Antónia Gusmão
Editora : Julia Chatarina
