AILEU, 17 Abríl 2024 (TATOLI)– Prezidente Interina Munisípiu Aileu, Vitória Mesquita do Rêgo, relata prosesu ezekusaun orsamentu jerál Estadu 2024 ne’ebé alokadu ba munisípiu Aileu ho montante $4,305.506, to’o fulan-abríl ne’e konsege ezekuta ona pursentu 21.
Tuir regra ezekusaun orsamentu kada trimestrál presiza ezekuta to’o pursentu 25% maibé munisípiu Aileu seidauk atinji metas ezekusaun ne’e tanba seidauk halo ezekusaun ba fundu kapitál menór.
Notísia Relevante :Aileu sei persiza aumenta tan funsionáriu 600
“Daudaun gastus ne’ebe mak ita atinje ona $750.492,36, equivalente 21%, ezekusaun sira ne’e ba pagamentu saláriu no vensimentu, bens no servisu, transferénsia públika no kapitál dezenvolvimentu. Balansu orsamentu atuál sei $3,415.173,” nia relata ba TATOLI durante programa live streaming iha salaun Prezidente Autoridade Munisípiu Aileu, kuarta ne,e.
Tuir relatóriu ezekusaun trimestrál dahuluk ne’e seidauk atinje tuir metas ne’ebé iha tanba iha kapitál menór nian seidauk halo pagamentu ba projetu infraestrutura hirak ne’ebé agora daudauk sei iha hela faze konstrusaun no reabilitasaun, entre obra hirak ne’e mak hanesan projetu reabilitasaun ba uma antiga administradór nian, konstrusaun kampu multifusaun, konstrusaun salaun Timor Klaran, konstrusan jardin Dom Maumeta, kontrusaun fatin lixu no projetu seluk tan.
“Ezekusaun seidauk atinje 25% tanba iha Q1 (trimestrál dahuluk) prosesu ezekusaun ba kapitál menór seidauk ezekuta tanba seidauk finansia projetu tenderizasaun sira, maibe ninia ezekusaun ne’e sei kontinua ba trimestre tuir mai. Ita hein katak iha nia prosesu andamentu ne’e sei fó rezultadu ezekusaun atinje regra ezekusaun orsamentu nian ba iha Q2 nian,” nia esplika.
Kona-ba preprasaun planu asaun anuál (PAA) munisípiu Aileu nian ba tinan 2025, Vitória Mesquita do Rêgo hateten, ba tinan oin autiridade munisipál sei kumpre ba verba orsamentu ho kategoria lima (5): saláriu no vensimentu, bens no servisu, transferénsia públika, kapitál menór no kapitál dezenvolvimentu.
“Ita-nia elaborasaun ba hirak ne’e hotu ita preve besik millaun $17, ida ne’e planu ne’ebe mak ami iha tanba hakarak atu implementa desentralizasaun, maibe ida ne’e depende ba aprezentasaun iha KROP (Komisaun Revizaun Orsamentu nível Polítika) iha Ministériu Finansa hodi tetu ba rásio orsamentu molok halo aprovasaun,” nia hateten.
Jornalista : Afonso do Rosário
Editór : Agapito dos Santos
