“Orsamentu PME 2023 ne’ebé la ezekuta sei fila ba kofre Estadu”
DILI, 17 abríl 2024 (TATOLI)—Diretór Servisu Edukasaun Munisípiu Manatuto (SEMM), Patrício da Crus, hateten orsamentu ba Programa Merenda Eskolár (PME) tinan 2023 ne´ebé ezekuta la hotu, Servisu Edukasaun Munisípiu Manatuto haruka fila ba kofre Estadu ne’e hamutuk rihun $248.
Notísia Relevante: Komisaun G iha PN husu hadi´a implementasaun merenda eskolár
“Orsamentu PME tinan 2023 ne’ebé la ezekuta hotu, ita haruka fila-fali ba kofre estadu hamutuk $248.413,72,” Patrício hateten ba Agência Tatoli, via WhatsApp, kuarta ne’e.
Husi osan ne’ebé la ezekuta hotu ne’e tanba implementasaun ba programa merenda eskolár ne´e la’o tarde, entaun osan referida tenke haruka fila ba kofre Estadu.
Nia hateten. Programa Merenda Eskolár (PME) ba tinan 2024 ne´e, tuir planu sei lansa iha 22 abríl 2024 iha Eskola Ensinu Báziku Sentrál (EBC) Lay Doe, postu administrativu Laleia, munisípiu Manatuto.
“Ba tinan ida-ne’e mós ita foin implementa iha trimestre daruak, tanba presiza dadus hosi eskola sira hotu, Tanba ne´e, ita labele implementa iha trimestre dahuluk entaun iha 22 abríl mak ita hala’o ona programa merenda eskolár ne’e,” nia hateten.
Estudante ne’ebé sai benefísiariu ba PME tinan 2024 nian ne´e hamutuk 13.218 ne´e maihusi Eskola Pre-Eskolar (EPE) iha eskola 21 ne´e ba EPE katólika, privada, komunidade no Eskola Ensinu Báziku (EB) ne’e EB katólika, Fundasaun no komunidade hamutuk 19.
“Tinan ne’e, ita aloka $755.012,16 hodi ezekuta ba PME, 2024 nian,” nia dehan.
Notísia Relevante: Servisu Edukasaun Manatuto sei lansa merenda eskolár iha 22 abríl
Jornalista : Osória Marques
Editór : Cancio Ximenes
