BOBONARO,18 abríl 2024 (TATOLI)-Bee Timor-Leste, Empreza Públika (BTL,EP), munisípiu Bobonaro foin lalais ne’e, dezliga ona kanalizasaun bee moos ne’ebe instala ba iha instituisaun Estadu nian hamutuk 10 tanba la selu taxa durante 2021 to’o 2024.
Koordenadór BTL,EP munisípiu Bobonaro, Adriano da Cruz, hateten BTL,EP desize foti asaun rigorozu ne’e tanba durante ne’e fó beibeik notifikasaun, maibé instituisaun Estadu nian hirak ne’e la kumpre sira-nia devér atu selu taxa ho ativu kada fulan, no balun selu duni maibé la efetivu.
Notísia Relevante:BTL,EP Bobonaro sei mellora sistema bee-moos ho kualidade
“Hau hanoin ita taka ona 10 resin, Diresaun Transporte Terreste, Diresaun Terra no Propriedades, Polisia Eskuadra Maliana, ita taka tanba repartisaun Estadu ne’ebé mak asegura lei no ordém,dalaruma ami ko’alia ba dalaruma dehan ami osan laiha ne’ebé ha’u husu repartisipasaun Estadu liu-liu ba delegasaun tetoriál sira atu follow-up ami-nia pedidu para bele selu dividas sira ne’e,”Nia informa ba Jornalista sira iha ninia servisu fatin, kinta ne’e.
Nia esplika tuir orientasaun governu nian durante tinan 2024, BTL,EP munisípiu Bobonaro tenke rekoilla taxa ba kofre Estadu ho montante rihun $63,605.68 kada fulan kontribui $5,300,47 hosi totál kliente 1.972.
Koordenadór ne’e fundamenta liután katak Instituisaun Estadu sira maka tenke hatudu ezemplu di’ak ba komunidade sira iha munisípiu Bobonaro atu nune’e ema hotu bele kumpre no hakru’uk ba lei ne’ebé vigora iha Timor-Leste.
“Ita-nia komunidade balun kbi’it la’ek de’it sei selu tanba saida repartisaun estádu funsionariu sira uza bee estraga la selu fali,ita selu ne’e ba sistema no osan sira ne’e mos la’ós tama mai konta BTL nian ne’e tama ba kofre Estadu tanba Ida ne’e repartisaun sira balu,dalaruma interpreta sala Katak nusa mak sasan estádu nia ne’e ita tenke selu,ne’e tanba ladun intende lei sira ne’e,”Adriano hateten.
Sorin seluk, Diretór Transporte Terreste, Delegasaun Teritoriál Munisípiu Bobonaro, José Paulo Henriques Baptista, rekoñese durante ne’e la selu taxa ba Estadu maibé ba futuru prontu atu koopera ho BTL,EP hodi selu taxa kada fulan.
“Ami la hetan forñesimentu bee hosi BTL,tanba seidauk kumpre devér maibé ha’u haruka ona pedidu pagamentu ba diresaun jerál husu sira atu bele atensaun konsidera no bele responde atu nune’e BTL bele halo fali kanalizasaun bee tanba ida ne’e implikasaun tebes ba utilizasaun casa de banho no mós nesesidade seluk-seluk tan,”José Paulo hatutan.
Notísia Relevante:BTL husu komunidade Maliana uza bee-moos tuir nesesidade
Jornalista: Sergio da Cruz
Editór: Agapito dos Santos
