DILI, 18 abríl 2024 (TATOLI)—Prezidente Repúblika, José Ramos Horta, konkorda 100% atu halo alterasaun ba Lei Komisaun Antí-Korupasaun (CAC-sigla portugés), tanba bele kontribui hodi aselera eleisaun ba komnisáriu CAC foun.
Notísia Relevante: Komisaun A aprova relatóriu no paresér ba alterasaun lei CAC
“Ha’u konkorda 100% alterasaun Lei CAC, tanba komisáriu CAC la’ós Prezidente Repúblika, tanba Prezidente Repúblika eleitu diretamente husi povu,” PR Horta hateten bainhira partisipa abertura sensibilizasaun ba programa Edukasaun Multi Língua, iha salaun Ian Martin INFORDEPE, Balide, kinta ne’e.
Ezemplu, nai dehan, iha Indonézia mós uluk Prezidente eleitu husi Parlamentu laran, kuandu Megawati eleitu ne’e mai husi Parlamentu, tanba ne´e demokrásia polítika la signifika unaminidade, la signifika konsensu maibé signifika de’it maiória.
“Ne’eduni, ha’u konkorda ho lei alterasaun CAC nian ba maiória simplés para hili komisáriu CAC,” nia dehan.
Tanba, Laureadu Prémiu Nobel da Paz ne´e hateten, bainhira Parlamentu Nasionál haruka lei alterasaun CAC ne’e ba Prezidente Republika, mak nia parte sei promulga.
“Kuandu Parlamentu Nasionál haruka alterasaun lei ne’e to’o ohin 11h00 dadeer ou tuku 10h00, ha’u promulga ona,” nia hateten.
Tuir Lei n°8/2009, 15 jullu, iha artigu 7 númeru 1, katak PN mak dezigna komisáriu CAC ho maioria absoluta, nune’e bainhira hetan prezensa husi pelu menus ¾ husi deputadu ho efetividade funsaun.
Iha alterasaun ne’ebé Governu propoin iha artigu 7° hodi dezigna komisáriu, ho artigu 11 hodi halo ezonerasaun ba komisáriu ho maioria absoluta de’it (Deputadu 33), hasai tiha ezijénsia prezensa ¾ ka husi deputadu na’in-49 ho efetividade funsaun.
Enkuantu, iha 12 abríl liubá, PN liuhusi reuniaun plenária estraordináriu, aprova pedidu urjénsia husi Governu ba diskute alterasaun daruak hosi lei númeru 8/2009, loron 15 jullu, kona-ba lei CAC.
Tuir rejimentu PN artigu 105.º inísiu diskusaun iha alínea 1, hateten diskusaun iha jeneralidade foka ba prinsípiu no sistema projetu ka proposta-lei ida-idak nian.
Hafoin diskusaun jeneralidade ramata, sei kontinua diskusaun iha faze espesialidade ne’ebé sei foku espesífiku ba mateira iha kada artigu ba proposta-lei ne’ebé aprezenta.
Notísia Relevante: PN aprova pedidu urjénsia husi Governu ba alterasaun lei CAC
Jornalista : Osória Marques
Editór : Cancio Ximenes
