DILI, 19 abríl 2024 (TATOLI)–Arsebispu Arkedioseze Metropolitana Dili, Dom Virgílio Kardeál do Carmo da Silva, SDB, hamutuk ho reprezentante Vatikanu iha Timor-Leste, Núnsiu Apostóliku, Marco Sprizzi no Ministru Administrasaun Estatál, Tomas do Rosário Cabrál, sesta ne’e, lansa ona sekretariadu provizóriu ida hodi hala’o preprasaun liga ho vizita Amu Papa Francisco, mai Timor-Leste iha fulan-setembru 2024.
Governu hamutuk ho Igreja lansa eskritóriu ne’e iha edifísiu eis ministru ka ministra finansa sira ne’ebé lokaliza iha Igreja-Motael Dili, nia sorin.
Notísia Relevante :Empreza Karya Timor sei finaliza konstrusaun altar misa Amu Papa durante fulan-haat
“Partir segunda-feira ba oin, atividade preparasaun ba vizita papa nian sei reuni no koordena iha ne’e hodi hein vizita ida hosi Vatikanu atu haree ita-nia kondisaun,” Tomas do Rosário Cabrál, hateten hafoin serimonia lansamentu no bensaun eskritóriu provizóriu iha Motael Dili.
Iha fatin hanesan, Arsebispu Arkedioseze Metropolitana Dili, Dom Virgílio Kardeál do Carmo da Silva, SDB hateten, desizaun governu liuhosi Ministériu Administrasaun Estatál (MAE), ne’e importante atu bele konsentra hamutuk entre parte Igreja ho Governu nian atu sai ekipa ida de’it nune’e bele aselere ninia preparasaun sira iha aspetu hotu-hotu.
“Ita hotu hatene katak ekipa rua ne’e presiza fatin ida ne’ebé koordenasaun ne’e bele la’o. Seksaun sira monta hotu ona, agora iha ne’e hanesan ohin seksaun sira mai hasoru malu iha ne’e. Sekretariadu sei funsiona semana tomak, servisu komesa la’o,” Dom Virgílio Kardeál do Carmos da Silva, SDB hateten.
Arsebispu Arkedioseze Metropolitana Dili, esplika hosi parte igreja nian, fahe ona seksaun sira ne’ebe sei hala’o servisu relasiona ho preparasaun vizita Sua Santidade Amu Papa nian mai Timor-Leste, tanba ne’e, seksaun sira ne’e sei konsentra hotu servisu iha eskritóriu provizóriu ne’e.
Antes, ekipa uja fatin ne’e hodi hala’o servisu, Arsebispu Arkedioseze Metropolitana Dili, Dom Virgílio Kardeal do Carmo da Silva, SDB fó kedas bensaun ba edifísiu ne’ebé maka governu hari’i ba eis ministru ka ministra finansa sira antes ne’e.
Notísia Relevante :Papa Francisco sei vizita Timor-Leste iha 09-11 setembru 2024
Jornalista: Jesuína Xavier
Editor:Agapito dos Santos
