DILI, 18 abríl 2024 (TATOLI)–Prezidente Repúblika, José Ramos Horta, hateten kazu membru Polísia Sientífika Investigasaun Kriminál (PCIC-sigla portugés) husu osan ba fujitivu ka reklozu Filipinu, Amalo Jr., nia oan ne’e hahalok ida grave no ninia prosesu la’o hela.
Notísia Relevante: PCIC suspende membru tanba suspeita husu osan ba oan hosi fujitivu iha estabelesimentu prizionál
“Kona-ba membru Polísia Sientífika Investigasaun Kriminál husu osan ba fujitivu nia oan ne’e, prosesu investigasaun la’o daudaun hela, no hahalok ne’e grave tebes. Ne’e perigozu, halo nune’e bele simu mós osan ou husu mós osan ba krime organizadu oin-oin hanesan droga brankeamentu, ida-ne’e perigozu,” PR Horta dehan ba jornalista sira, hafoin partisipa iha lansamentu programa Edukasaun Multi Língua (EMuLi), iha salaun Ian Martin, Balide, kinta ne´e.
Prezidente Horta hateten, klaru uluk kedas Kay Rala Xanana Gusmão dehan tiha ona ida simu tenke halo, maibé reforma ne’e halo fatin hotu-hotu para moderniza no hadi’ak liután Estadu ida-ne’e.
“La’ós PCIC lahalo serbisu di’ak. Uluk, ha’u lakonkorda PCIC iha premeiru mandatu, di’ak-liu reforsa de’it kompeténsia PNTL nian ba haree kestaun sira-ne’e, maibé momentu ne’ebá Governu AMP rasik mak hakarak kria PCIC. Agora, pronto, labele sobu ita haree oinsá hadi’a di’ak liután tanba ema iha ne’eba iha kompetente labele hateten PCIC aat hotu,” nia dehan.
Antes ne´e, Ministru Justisa, Sergio Hornai, hateten ei demite oknum Polísia Sientífika Investigasaun Kriminál (PCIC, sigla portugés) ho inisiál OA ne’ebé ho via telefone hodi husu osan ba fuzitivu Arnolfo Teves Jr, nia oan atu fó seguransa ba nia aman Arnolfo Teves Jr, iha prizaun Becora.
Nia dehan, rezultadu investigasaun kuandu konklui ona mak komprova duni oknum PCIC komete duni prátika ida-ne’e mak hanesan Ministru Justisa sei foti desizaun hodi hasai hosi servisu.
“Sidadaun hothotu ne’ebé envolve iha kazu infrasaun, iregularide, ilísitu tenke sujeita ba prosesu investigasaun no prosesa tuir lei haruka. Se saida, hasai nia hosi servisu,” Sergio Hornai hateten ba jornalista sira hafoin konklui reuniaun Konsellu Ministru iha Palásiu Governu.
“Konserteza, ha’u hanesan ministru, ha’u simu ona relatóriu maibé ha’u labele pronúnsia buat ruma, bainhira iha hela prosesu nia laran. Hein to’o ha’u halo desizaun. Prosesu sei la’o to’o iha ne’ebá. Lei la admite katak funsionáriu tenke kobra osan hosi sidadaun ruma,” nia dehan.
Iha segunda (08 abríl 2024) ne´e, Investigadó hosi Polísia Sientífika Invetigasaun Kriminál (PCIC, sigla Portugés) halo ona avariguasaun no halo ona suspensaun ba oknum PCIC ho inisiál OA hosi nia servisu hanesan membru PCIC, tanba oknum ne’e submete hela ba prosesu averiguasaun.
Notísia Relevante: Ministériu Justisa sei demite oknum PCIC ne’ebé husu osan ba sidadaun Filipina
Jornalista : Osória Marques
Editór : Cancio Ximenes
