FJDE tulun EhD iha Fatuquero dezenvolve negósiu kore-aan husi dependénsia
ERMERA, 19 abríl 2024 (TATOLI)—Forum Juventude Defísiénsia Ermera (FJDE) ho nia inisiativa rasik apoiu Ema ho Defisiénsia (EhD) sira iha Suku Fatuquero, postu administrativu Railaco, munísipiu Ermera, hodi desenvolve rasik negosíu atu bele korre-aan husi dependénsia ho ema seluk hodi hatutan moris.
Notísia Relevante: Xefe Suku Fatuquero husu FJDE rejista iha MSSI Ermera
Koordenadór Grupu FJDE, Marcos de Deus Martins (idade 33), hateten iha fulan-setembru tinan 2019 liuba, nia hanesan ema ho defisiénsia físku hamuutk ho belun na’in-haat (4) konsege harii ona FJDE hodi fó apoiu ba ema ho defísiénsia atu bele partisipa iha dezenvolvimentu iha setór pruditivu sira liuliu ba empreendedorizmu nian.
“Kuaze organizasaun barak ko’alia advokasia maibe seidauk ko´alia atividade produtivu no espesifiku ne’ebé ema ho defisiénsia sira bele halo. Nune’e mak FJDE kria grupu atu ita bele liga ba ema ho defisiénsia maske ho kondisaun diferensa, maibe ita haree katak sira bele hola parte ba servisu agrikultura, Tanba, dalaruma, ema hanoin katak ema ho defisiénsia sira hein simu de´it,” Marcos de Deus Martins hateten ba jornalista sira-ne´ebé hala’o Mídia Tour 2024 ba vizita munisípiu Ermera, iha aldeia Palemanu, suku Fatuquero, sesta ne’e.
Grupu FJDE ne’ebé akumula husi ema na’in-liman (5) inklui na’in-tolu (3) ho kondisaun moris hanesan ema ho defisiénsia ne´e konsege hala’o atividade sira hanesan produsaun kafé-uut, suku hena no ortikultura.
Iha grupu produsaun kafé-uut nian ne´e, FJDE koordena ho kliente ka kafé-na’in hamutuk 12 hodi sai hanesan distribuidór kafé kada tinan ba FJDE, ho folin kuaze $0.40/kilograma bazeia ba presu iha nasionál.
“Presu kafé ita sosa ne’e haree ba folin kafé iha merkadu. Kuandu NCBA sira fó kafé-kulit tasak ne’e fo $0.35/kilo entaun ita ba fali $0.40/kilo para ita atu asegura sira labele fó lai. Baibain kafé ho kulit ne’e nia folin tun ba $2.50 kada kilo, maibé ita halo inovasaun fali folin sa´e,” nia esplika.
Iha tinan 2022, nia dehan, FJDE konsege rekolla ona kafé-kulit tasak hamutuk 48kg ho folin kuaze $20 hafoin prodús fila-fali ba kafé-uut hodi faan ho folin hanesan 0.5kg/$5.00 no 1kg/$10.00.
Grupu FJDE ne´e hetan apoiu husi membru la permanente na’in-ne’en (6) inklui ema ho defisiénsia na´in-tolu (3) ne’ebé hanesan mós na´in ba kafé, hodi kolleta kafé to’o ba produsaun kafé-uut durante fulan ne’en nia laran.
“Husi kafé-uut kada fulan bele hetan rendimentu kuaze $80.00,” nia hateten.
FJDE mós envolve feto sira-ne’ebé prodús sasán liuhosi suku kartera, pasta, máskara no seluk tan ho folin $1.00 to’o $5.00.
Nune’e mós, ba produsaun ortikultura sira hanesan modo-mutin, repollu, brinjela no seluk tan bele hetan $60 to’o $70.
Membru FJDE, Carlito Soares (idade 51), ne’ebé ho kondisaun defisiénsia fízíku, agradese tebes ba ezisténsia grupu nian bele fó oportunidade hodi desenvolve aan liuliu oinsá maneja osan no sustenta nesesidade familia uma laran nian.
“Hodi grupu mak ita hetan buat oioin. Tenke hanoin ba futuru, ita mós sei bele hela, labele fo kuitadu tanba matenek ne’e subar hela no liuhusi grupu mak bele aumenta ita-nia koñesimentu, motiva no tutan liman ain ba ita hanesan ema ho defisiénsia. Hanesan ami ho família oan na’in-ualu (8), hein de´it husi Estadu ne’e la too, maibe husi grupu ne’e ami bele dada tan ami-nia maluk defisiénsia sira hodi buka moris,” nia dehan.
Maske nune´e, ho esforsu oioin sira halo maibé to´o agora ne´e FJDE siedauk hetan apoiu direita husi Governu liuhusi parte servisu sosiál no agrikultura hodi dezenvolve sira-nia atividade loro-loron nian ba oin.
Jornalista : Cidalia Fátima
Editór : Cancio Ximenes
