ERMERA, 20 abríl 2024 (TATOLI)—Responsável RHTO (Raes Hadomi Timor Oan) iha Munisípiu Ermera, Joanico Pereira dos Santos, rekoñese Ema ho Defisiénsia barak iha Munisípiu Ermera seidauk bele hetan subsídiu no apoiu sosiál husi Governu tanba problema dokumentu pesoál la kompletu.
Notísia Relevante: FJDE tulun EhD iha Fatuquero dezenvolve negósiu kore-aan husi dependénsia
Nia hatutan, tuir dadus Sensus 2023 ba Munisípiu Ermera rejista EhD hamutuk 4.421 ne’ebé ho nia tipu defisiensia hamutuk kategoria lima mak hanesan ema ho dfeisiénsia fíziku, ema ho defisiénsia matan, ema ho defisiénsia iha komunikasaun, ema ho defisiénsia mentál no ema ho defisiénsia intelektuáll.
“Husi númeru defisiensia ne’ebé mak eziste iha munisipiu Ermera ba oras ne’e, balun hetan ona apoiu no balun seidauk. Sira-ne´ebé seidauk hetan apoiu ne’e, tanba balun hetan failansu husi dukumentu sira hanesan kartaun eleitoral no sertidaun RDTL. Husi dukumentu sira-ne’e mak prejudika ema ho difisiénsia atu hetan sira nia diretu,” Joanico Pereira dos Santos hateten ba jornalista sira iha edifisiu Dirasaun Nasional Kooperativa, Mikro no Pequena Empreza, Gleno, sesta ne’e.
Maske nune’e, nia dehan, RHTO nafatin halo kooperasaun ne’ebé di’ak ho familia sira hodi halo tratamentu ne’ebé dignu ba ema ho defisiénsia sira, atu nune’e bele asesu ba diretu saida mak sira husu hanesan kadeira roda, ai-tonka no seluk tan.
Nia husu kooperasan husi família EhD sira, tanba prezensa RHTO hanesan dalan ida atu fasilita de´it, maibé parte família mak tenke asegura sira-nia oan, karik sira husu apoiu ruma kona-ba kadera roda ka ai-tonka hodi fasilita sira.
“Ami sempre halo advokasia ho inkluzaun defisiénsia nomós asuntu ema ho defisiénsia. Husi advokasia ne’e rasik la’ós de’it ba ema ho defisiénsia, maibé ba hotu-hotu hanesan autoridade lokál, autoridade munisipiu, komunidade nomós eskola sira, atu nune’e partilla informasaun ba sira kona-ba oinsá hatene asuntu inkluzaun nomós asuntu ema ho defisiénsia, Ho nune’e, ema hotu bele hatene uza liafuan ba ema ho defisiénsia ne’e ho dignu. Karik, bolu ema ho defisiénsia ho liafuan ne’ebé mak ita sente orgullu,” nia haklean.
Hosi tinan 2019 to’o agora, RHTO akompaña ona EhD hamutuk 100 hodi trata dokumentu hanesan atestadu médiku, kartaun eleitorál, billete identidade nomós sertidaun RDTL, atu nune’e sira bele asesu ba dukumentu ida-ne’ebé mak komplementu.
Diretor Sentru Soldaridade Sosiál Munisipiu Ermera, Vito Caio do Santos, hateten totál EhD ne’ebé rejista ona iha MSSI Ermera hamutuk 2000-resin maibé sei iha posbilidade ba sira seluk liuliu iha área rurál ka remota atu bele rejistu.
“Ita nafatin halo sensibilizasaun ba iha postu administrativu sira iha munisípiu to’o iha suku no aldeia, nune´e autoridade komunitáriu sira halo resensiamentu lista foun ba EhD iha Ermera inklui sira-ne’ebé seidauk tama iha lista,” nia esplika.
Aleinde subsídiu e’ebé kada tinan MSSI prepara, iha mós programa apoiu sosiál ba EhD no ema vulnerável sira tuir dadus ne’ebé rejista husi suku sira. Apoiu sosil sira mak hanesan nesesidade bazika hanesan foos, mina-tein no seluk tan.
Iha OJE 2024, MSSI aloka $39.000 ba Sentru Solidaridade Sosial Munisípiu Ermera ne’ebé aloka ba área oioin hanesan administrasaun, rekursu umanu selu funsionariu no la inklui orsamentu kondisionál ba iha idozu inválidez sira.
“Orsamentu ne’e MSSI aloka mai iha sentru Solidaridade Sosial Munisípiu Ermera ne’e la sufisiente, tanba ita laiha orsamentu espesifiku atu kobre ba iha problema sosiál sira-ne’ebé akontese iha área rurál,” nia hateten.
Notísia Relevante: Mídia Tour 2024 lori jornalista sira besik ba povu
Jornalista : Cidalia Fátima
Editór : Cancio Ximenes
