ERMERA, 20 abríl 2024 (TATOLI)—Asosiasaun Jornalista Timor Lorosa’e (AJTL) servisu hamutuk ho ONG Oxfam iha Timor-Leste finaliza ona Mídia Tour 2024 ne’ebé lori jornalista 13 husi meiu komunikasaun sosiál oioin besik liután ba povu iha munisípiu Ermera.
Notísia Relevante: FJDE tulun EhD iha Fatuquero dezenvolve negósiu kore-aan husi dependénsia
Partisipante Mídia Tour 2024 husi Jornál Independente, Domingos Gomes, sente atividade ida-ne´e di´ak tebes, tanba lori Jornalista sira tun ba iha baze hodi hare’e realidade povu baibain nia kontribuisaun ba dezenvolvimentu nasionál.
“Ha´u hanesan partisipante sente di´ak, tanba ita bele reprezente duni povu nia lian atu hato’o saida mak povu sira kontribui ba prosesu dezemvolvimentu ho dezafiu sira-ne´ebé povu enfrenta. Hu nune´e, ita bele divilgua informasaun referida, atu Governu bele responde tuir realidade ne’ebé povu hasoru iha terrenu,” Domingos Gomes hateten ba Tatoli, iha suku Fatuquero, Ermera, sábadu ne´e.
Antes ne’e, Reprezentante Country Director Oxfam iha Timor-Leste, Adilson Junior, hateten AJTL kontinua iha nian kompromisu hodi servisu hamutuk ho Oxfam iha Timor-Leste, atu hala’o Mídia Tour. Oxfam ho AJTL la’ós foin mak halo Mídia Tour, maibé Mídia Tour ida-ne’e halo iha tinan ida liu ba ona, hodi kontinua halo kobertura ba joven kreativu ne´ebé hela iha munisípiu sira.
“Programa Mídia Tour ida-ne’e ho ojetivu atu lori Jornalista sira ba iha munisípiu Ermera, hodi halo kobertura kona-ba joven sira nia kreatividade, liga ho sira nia investimentu iha setór Agrikultura. Aleinde ne’e, iha mós joven sira-ne’ebé mak hetan oprtunidade ba iha programa Seazonal Work Program, halo mós kobertura ba sira-nia susesu no saida mak sira kontribui iha sira-nia hela fatin no iha komunidade,” nia esplika.
Diretor Timor-Leste Organic Fertilzer (TILOFE), Zaquiel Martins, sente kontente tebes servisu hamutuk ho AJTL no Oxfam iha Timor-Leste, no hili ona TILOFE, EAMO (Ermera Aikulat Mutin Organiku) no FJDE (Forum Juvenude Defisiensia Ermera) sai alvu ba Mídia Tour 2024.
“Ida-ne’e servisu besik liu ba iha komunidade iha Ermera, no sai hanesan alvu ba jornalista sira oinsá maka lori sira atu bele deskobre problema sosiál sira-ne’ebé mak akontese iha munisípiu Ermera,” Zaquiel Martins hateten.
Prezensa jornalista sira-nia iha Ermera ne´e konsegue deskobre problema ema ho defisiénsia sira-nian ne’ebé sira balun hetan apoiu husi Governu no Organizasaun maibé seidauk másimu, entaun prezensa jornalista sira bele lori tan sira-nia lian ba iha ministériu kompetente.
“Jo nune´e, ema ho defisiénsia labele sai de´it projetu iha momentu balun, polítiku sira labele halo sira hanesan temporáriu de´it, maibé ema ho defisiénsia no LGBT sira, ema-ne’e sai planu premanente ne’ebé maka Governu iha dever atu tau atensaun ba sira,” nia dehan.
Programa Mídia Tour ne’e hetan apoiu husi Governu Austrália liuhusi DFAT ho nia projetu PROSIVU no implementa husi Oxfam iha Timor-Leste nomós AJTL inklui TILOFE, EAMO no FJDE.
Partisipante ba Midia Tour 2024 ne´e iha jornalista hamutuk 13 ne´ebé reprezenta ida-idak nia mídia mak hanesan Tatoli, Mídia Mudansa, Jornál Independente, Radio Liberdade, TVE, Lafaek News, Dili Post, Gardamor TV, Timor Post, Diligente, RTTL no Radio Labeh.
Asaun karitativa husi partisipante Mídia Tour 2024
Iha biban ne’e, partisipante Mídia Tour 2024 ho ideia kreativu hala’o asaun karitativa ba inan ida ho kondisaun ne´ebé moris hanesan ema ho defisiénsia ne´ebé hela iha suku Fatuquero, postu administrativu Railaco, munisipiu Ermera.
Koordenadór Mídia Tour 2024, Constáncio Vieira, esplika jornalista la’ós halo advokasia de’it maibé pelumenus asaun kiikoan ne’ebé mak jornalista sira bele halo, hodi fó apoiu ba ema ho defisiénsia sira.
“Ohin, buat kiikoan ne’ebé mak ami lori, ita-nia oan jornalista sira mak iha inisiativa hodi hakarak lori mai. Labele haree ba iha nia kuntidadade barak ka uitoan, maibé haree ba ami nia domin,” Koordenadór Media Tour 2024, Constancio Vieira, hateten.
Reprezentante família no hanean mós ema ho defisiénsia fíziku Filomena Soares nia laen-kaben, Roberto de Deus hato’o agradesimentu ba Maromak tanba domin husi jornalista sira mai to’o iha fatin ida-ne’e hodi haree rasik kondisaun moris familia ida-ne’e nian.
“Agradese ba Maromak tanba domin husi oan jornalista sira, maske hala’o hela nia programa maibé ho fuan ne’ebé boot tebes, hodi mai to’o iha ami-nia fatin ida hanesan ne’e. Ba ita-boot sira, halo nafatin ita boot sira-nia servisu ho di’ak no susesu nafatin, atu lori nafatin ita-nia rain ida-ne’e ba iha futuru ne’ebé diak liután,” Roberto de Deus dehan.
Asaun kartitativa ne’e rasik hanesan ideia husi Jornalista sira hamutuk ho TILOFE, EAMO no FJDE hodi fó apoiu nesesidade bázika hanesan foos, mina tein, manu-tolun, masin-midar, susu-been, rinso no seluk tan.
Notísia Relevante: Xefe Suku Fatuquero husu FJDE rejista iha MSSI Ermera
Jornalista : Cidalia Fátima
Rditór : Cancio Ximenes
