BOBONARO, 22 abríl 2024 (TATOLI)-Adjuntu Diretora Rejionál, Programa Aihan Mundiál (WFP-sigla inglés), Ázia Pasífiku, Anita Hirsch, segunda ne’e, ho komitiva hala’o vizita bá Eskola Bázika Sentrál (EBC), postu administrativu Maliana, munisípiu Bobonaro, hodi haree diretamente kona-ba planu konstrusaun coziña ne’ebé maka sei konstrui iha tempu besik.
“Hau haksolok tebes bele mai eskola ida ne’e hodi hasoru direitamente professór no alin estudante sira loos duni katak nutrisaun ne’e esensiál tebes ba labarik nia dezenvolvimentu labarik ida sei la aprende di’ak iha aula laran kuandu nia kabun mamuk tanba ne’e, mak forñese aihan nutritivu ne’e importante, maibé tenke nutrisaun loloos ida ne’e hanesan keahlian hosi WFP nia,” Jerente WFP Azía Pasifiku, hateten durante ninia vizita ne’e iha Raifun Maliana.
Notísia Relevante:Governu-WFP entrega untensilus dapur 13 ba EBC iha Maliana
Nia dehan, objetivu hosi vizita ne’e atu haree diretamente kona-ba kondisaun armazén, planu konstrusaun coziña ba programa merenda eskolár, no seluk tan. Nune’e mós halo enkontru ho grupu agrikultór sira hodi diskute kona-ba melloramentu progama produtu lokál inklui ninia merkadu sira.
Anita Hirsch, afirma World Food Progamme ho Ajénsia Kooperasaun Internasionál Korea (KOICA), iha kompromisu atu fó nafatin apoiu ba Timor-Leste hodi hadi’a programa merenda eskolár liu-liu fornesimentu utensilus coziña no kontrusaun coziña ba programa merenda eskolár iha tempu besik.
Iha fatin hanesan Sekretáriu Autoridade Munisipál Bobonaro ba Asuntu Sosiál, Julio Carvalho Caero, espera ho vizita hosi Adjuntu Diretora Rejionál, Programa Aihan Mundiál (WFP-sigla inglés), Ázia Pasífiku, Anita Hirsch, sei dezenvolve di’ak liután programa merenda eskolár.
“Ha’u espera programa merenda eskolár ne’e bele aumenta kapasidade estudante sira-nia tanba ami Bobonaro kategoria má-nutrisaun ne’e segundu lugár ne’ebé programa ne’e hansan meius ida atu redúz tiha má-nutrisaun, ami autoridade prontu apoiu no kolabora ho parseiru sira atu dezenvolve programa ne’e iha munisípiu Bobonaro,” nia hateten.
Entretantu, liuhosi orsamentu jerál Estadu (OJE) 2024, governu sentrál aloka orsamentu hamutuk millaun $1,538.56 ba estudante benifisiáriu rihun 27-resin ho loron efetivu 191.
Notísia Relevante:Autoridade Bobonaro lansa programa merenda eskolár 2024 iha EBC Raifun
Jornalista: Sergio da Cruz
Editór: Agapito dos Santos
